സോഷ്യൽ മീഡിയയിൽ സ്വാധീനം ചെലുത്തിയ റഷ്യൻ ബൈക്കർ ടാറ്റിയാന ഒസോലിന വാഹനാപകടത്തിൽ മരിച്ചു. തുർക്കിയിൽ ബൈക്ക് റേസിംഗിനിടെയാണ് അപകടമുണ്ടായത്. 38 വയസ്സായിരുന്നു യുവതിക്ക്. “റഷ്യയിലെ ഏറ്റവും സുന്ദരിയായ ബൈക്കർ” എന്ന് വിളിക്കപ്പെടുന്ന ഓസോലിന ലോകമെമ്പാടുമുള്ള സാഹസിക യാത്രകൾക്ക് പേരുകേട്ടിരുന്നു.
മിലാസ്-സോക്ക് ഹൈവേയിൽ തന്റെ ചുവന്ന ബിഎംഡബ്ല്യു മോട്ടോർസൈക്കിൾ ഓടിക്കുന്നതിനിടെ ഒസോലിന ഒരു ട്രക്കിൽ ഇടിക്കുകയായിരുന്നു. അത്യാഹിത വിഭാഗങ്ങൾ ഉടൻ സംഭവ സ്ഥലത്ത് എത്തിയെങ്കിലും യുവതി മരിച്ചിരുന്നു.
ഒസോലിനയ്ക്കൊപ്പം ബൈക്ക് ഓടിച്ചിരുന്ന തുർക്കി ബൈക്ക് യാത്രികനായ ഒനുർ ഒബുട്ടിന് ഗുരുതരമായി പരിക്കേറ്റു. ഇയാളെ ചികിത്സയ്ക്കായി ആശുപത്രിയിൽ പ്രവേശിപ്പിച്ചിരിക്കുകയാണ്. അതേസമയം, ഇവർക്കൊപ്പം ഉണ്ടായിരുന്ന മൂന്നാമത്തെ ബൈക്ക് യാത്രികന് പരിക്കില്ല. അപകടം ഉണ്ടായ സാഹചര്യത്തെപ്പറ്റി അധികൃതർ അന്വേഷിക്കുന്നുണ്ട്.
