സമുദ്രത്തിൽ നിന്ന് നാല് കിലോമീറ്റർ താഴ്ചയിൽ ‘ഡാർക്ക്’ ഓക്സിജൻ; സൂര്യപ്രകാശം ഇല്ലാതെയും ഓക്സിജൻ രൂപപ്പെടും? തെളിവായി ലോഹക്കട്ടകൾ

സൂര്യപ്രകാശത്തിൽ നിന്ന് സസ്യങ്ങൾ ഭക്ഷണം നിർമ്മിക്കുന്ന പ്രവൃത്തിയാണ് പ്രകാശ സംശ്ലേഷണം. ഈ സമയം അന്തരീക്ഷത്തിലെ കാർബൺ ഡൈ ഓക്സൈഡിനെ വലിച്ചെടുത്ത് ഓക്സിജനെ പുറന്തള്ളുകയാണ് സസ്യങ്ങൾ ചെയ്യുന്നത്. സസ്യങ്ങൾ പ്രകാശ സംശ്ലേഷണം നടത്തിയാൽ മാത്രമേ ഭൂമിയിൽ ആവശ്യമായ ഓക്സിജൻ ലഭിക്കൂ. വേണ്ടത്ര സൂര്യപ്രകാശം ലഭിക്കാതെ സസ്യങ്ങൾക്ക് പ്രകാശ സംശ്ലേഷണം നടത്താൻ സാധിക്കില്ലെന്നാണ് നേച്ചർ ജിയോസയൻസ് ജേണലിൽ പ്രസിദ്ധീകരിച്ച പഠനത്തിൽ പറയുന്നത്. എന്നാൽ ഈ പഠന റിപ്പോർട്ടിൽ നിന്ന് വിചിത്രമായൊരു കണ്ടെത്തലാണ് ശാസ്ത്രലോകത്ത് നിന്നുമെത്തുന്നത്.

പസഫിക് സമുദ്രത്തിൽ, 4,000 മീറ്റർ അഥവാ 13,100 അടി താഴെയായി ‘ഡാർക്ക്’ ഓക്സിജൻ കണ്ടെത്തിയിരിക്കുകയാണ് സമുദ്ര ശാസ്ത്രജ്ഞനായ ആൻഡ്രൂ സ്വീറ്റ്മാൻ. സൂര്യപ്രകാശമില്ലാതെ ഓക്സിജൻ രൂപപ്പെട്ടതെങ്ങനെയെന്ന അമ്പരപ്പിലാണ് ലോകം. കൽക്കരി കട്ടകൾ‌ക്ക് സമനമായ ലോഹകട്ടകളാണിത്. ഈ കട്ടകൾ വെള്ളത്തിന്റെ തന്മാത്രകളെ ഹൈഡ‍്രജനും ഓക്സിജനുമായി വിഭജിക്കുന്നുവെന്നും ശാസ്ത്രജ്ഞർ കണ്ടെത്തി.

ഹവായിക്കും മെക്സിക്കോയ്‌ക്കും ഇടയിലുള്ള സമുദ്രത്തിന്റെ അടിത്തട്ടിൽ കണ്ടെത്തിയ ഈ ലോഹക്കട്ടകളെ ഒരു സം​ഘം ശാസ്ത്രജ്ഞർ പഠനവിധേയമാക്കി. ഭൂമിയിലെ എല്ലാ ജീവജാലങ്ങൾക്കും ആവശ്യമായതിനേക്കാളെറെ ഓക്സിജൻ ഇവിടെ രൂപപ്പെട്ടതായി പഠനം നടത്തിയവർ അവകാശപ്പെടുന്നു. പ്രകാശ സംശ്ലേഷണത്തിലൂടെയാണ് ഓക്സിജൻ ഉണ്ടാകുന്നതെന്ന കാലങ്ങളായുള്ള നി​ഗമനത്തെ വെല്ലുവിളിക്കുന്നതാണ് പുതിയ കണ്ടെത്തൽ.

കോബാൾട്ട്, നിക്കൽ, മാംഗനീസ്, കോപ്പർ തുടങ്ങിയ ധാതുക്കളുടെ സാന്നിധ്യമാണ് ലോഹക്കഷണങ്ങളിൽ കണ്ടെത്തിയിരിക്കുന്നത്. ഷെല്ലിന്റെ അവശിഷ്ടങ്ങൾ, കടൽജീവികളുടെ പല്ലുകൾ തുടങ്ങിയ ഉൾപ്പടെയുള്ളവയിൽ രാസപ്രവർത്തനം നടന്നതാകാം ഈ ധാതുക്കളുടെ രൂപീകരണത്തിലേക്ക് നയിച്ചത്. ദശലക്ഷക്കണക്കിന് വർഷങ്ങളെടുത്താണ് ഡാർക്ക് ഓക്സിജൻ രൂപപ്പെട്ടതെന്ന് പുതിയ പഠനറിപ്പോർട്ടിൽ പറയുന്നു‌.

സമുദ്രത്തിന്റെ അടിത്തട്ടിലെ ഓക്സിജൻ ജീവന്റെ ഉത്ഭവത്തെ കുറിച്ച് പുതിയ ഉൾക്കാഴ്ചകൾ നൽകുമെന്നാണ് വിലയിരുത്തൽ. പ്രകാശസംശ്ലേഷണം അല്ലാതെ മറ്റൊതോ തരത്തിൽ ഭൂമിയിൽ ഓക്സിജൻ രൂപപ്പെടുന്നുണ്ടാകാമെന്ന് സ്വീറ്റ്മാൻ അഭിപ്രായപ്പെടുന്നു. ഭൂമിയിലെ ഓക്സിജന്റെ പകുതിയിലേറയും സമുദ്രത്തിലാണ് ഉത്പാദിപ്പിക്കപ്പെടുന്നത്. പ്ലാങ്കണുകൾ, ജലസസ്യങ്ങൾ, ആൽ​ഗകൾ, ചില ബാക്ടീരിയകൾ എന്നിവയാണ് സമുദ്രത്തിലെ ഓക്സിജന്റെ ഉച്പാദനത്തിലെ പ്രധാനികൾ. ഇവയെല്ലാം പ്രകാശസംശ്ലേഷണത്തിലൂടെയാണ് ഓക്സിജൻ ഉത്പാദിപ്പിക്കപ്പെടുന്നതെന്ന് കണ്ടെത്തിയിട്ടുണ്ട്.