കോഴിക്കോട്: സംസ്ഥാനത്ത് ഒരു കുട്ടിക്ക് കൂടി അമീബിക് മസ്തിഷ്ക ജ്വരം സ്ഥിരീകരിച്ചു. കോഴിക്കോട് സ്വകാര്യ ആശുപത്രിയിൽ ചികിത്സയിലായിരുന്ന നാലുവയസുകാരനാണ് മസ്തിഷ്ക ജ്വരം സ്ഥിരീകരിച്ചത്. കാരപ്പറമ്പ് സ്വദേശിയായ കുട്ടിയുടെ ആരോഗ്യനില തൃപ്തികരമാണെന്ന് ആശുപത്രി അധികൃതർ അറിയിച്ചു.
കുട്ടി രണ്ട് കുളങ്ങളിൽ കുളിച്ചിരുന്നതായി ആരോഗ്യപ്രവർത്തകർ അറിയിച്ചു. ഇവിടെ നിന്നാണ് വൈറസ് ബാധിച്ചതെന്നാണ് സംശയം. രോഗ ലക്ഷണങ്ങൾ കാണിച്ചതിനെ തുടർന്ന് കുട്ടി പത്തു ദിവസമായി ആശുപത്രിയിൽ ചികിത്സയിൽ തുടരുകയാണ്. പോണ്ടിച്ചേരി വൈറോളജി ലാബിൽ നിന്നുള്ള പരിശോധനാ ഫലമാണ് പുറത്ത് വന്നിരിക്കുന്നത്. നേരത്തെ പ്രാഥമിക പരിശോധനയിലും കുട്ടിക്ക് മസ്തിഷ്ക ജ്വരം സ്ഥിരീകരിച്ചിരുന്നു.
അതേസമയം, രണ്ട് ദിവസങ്ങൾക്ക് മുമ്പ് രോഗം സ്ഥിരീകരിച്ച കണ്ണൂർ സ്വദേശിയായ മൂന്നര വസയുകാരൻ വെന്റിലേറ്ററിൽ തുടരുകയാണ്. കുട്ടി മരുന്നുകളോട് പ്രതികരിക്കുന്നുണ്ടെന്ന് ആരോഗ്യപ്രവർത്തകർ അറിയിച്ചു.
