അഹമ്മദാബാദ്: രാഷ്ട്രപതി ദ്രൗപദി മുര്മുവിന്റെ മൂന്ന് ദിവസത്തെ ഗുജറാത്ത് സന്ദര്ശനത്തിന് ഇന്ന് തുടക്കം. സെപ്റ്റംബര് 21 മുതല് 23 വരെയാണ് രാഷ്ട്രപതിയുടെ ഗുജറാത്ത് സന്ദര്ശനം. സന്ദര്ശനത്തിന്റെ ഭാഗമായി സെപ്റ്റംബര് 22ന് ഏകതാ നഗര് (കെവാഡിയ)യില് നടക്കുന്ന 72-ാം ദേശീയ ചലച്ചിത്ര പുരസ്കാര വിതരണച്ചടങ്ങില് രാഷ്ട്രപതി പങ്കെടുക്കും. 2024ലെ ഇന്ത്യന് സിനിമയിലെ മികച്ച നേട്ടങ്ങള്ക്കുള്ള പുരസ്കാരങ്ങളാണ് ചടങ്ങില് സമ്മാനിക്കുന്നത്. 1954ല് ആരംഭിച്ച ദേശീയ ചലച്ചിത്ര പുരസ്കാരങ്ങള് സിനിമാ മേഖലയിലെ രാജ്യത്തെ പ്രധാന ബഹുമതികളിലൊന്നാണ്. കേന്ദ്ര വാര്ത്താവിതരണ-പ്രക്ഷേപണ മന്ത്രാലയമാണ് പുരസ്കാരങ്ങള് വര്ഷംതോറും നല്കുന്നത്.
ഫീച്ചര് സിനിമ, നോണ്-ഫീച്ചര് സിനിമ, സിനിമയെക്കുറിച്ചുള്ള എഴുത്ത് എന്നീ വിഭാഗങ്ങളിലെ മികച്ച സര്ഗാത്മകവും സാങ്കേതികവുമായ പ്രവര്ത്തനങ്ങള് പുരസ്കാരങ്ങള് പരിഗണിക്കുന്നു. 72-ാം ദേശീയ ചലച്ചിത്ര പുരസ്കാര ജേതാക്കളെ 2026 ജൂലൈ 18നാണ് പ്രഖ്യാപിച്ചത്. ഫീച്ചര് ഫിലിം വിഭാഗത്തില് ‘ആര്ട്ടിക്കിള് 370’ മികച്ച ചിത്രമായി തിരഞ്ഞെടുക്കപ്പെട്ടു. യാമി ഗൗതം മികച്ച നടിക്കുള്ള പുരസ്കാരം നേടി. മമ്മൂട്ടി (‘ഭ്രമയുഗം’), കാര്ത്തിക് ആര്യന് (‘ചന്ദു ചാമ്പ്യന്’) എന്നിവര് മികച്ച നടനുള്ള പുരസ്കാരം പങ്കിട്ടു. ‘അമരന്’ എന്ന ചിത്രത്തിലൂടെ രാജ്കുമാര് പെരിയസാമി മികച്ച സംവിധായകനായി തിരഞ്ഞെടുക്കപ്പെട്ടു.
‘കല്ക്കി 2898 എഡി’ മികച്ച ജനപ്രിയ ചിത്രത്തിനുള്ള പുരസ്കാരവും ‘ഭംഗാര്’ മികച്ച നോണ്-ഫീച്ചര് ചിത്രത്തിനുള്ള പുരസ്കാരവും ‘റാം-നാമി’ മികച്ച ഡോക്യുമെന്ററിക്കുള്ള പുരസ്കാരവും നേടി. ‘സ്വാതന്ത്ര്യ വീര് സവര്ക്കര്’ എന്ന ചിത്രത്തിലൂടെ രണ്ദീപ് ഹൂഡ മികച്ച നവാഗത സംവിധായകനുള്ള പുരസ്കാരവും സ്വന്തമാക്കി. സിനിമയെക്കുറിച്ചുള്ള മികച്ച രചനയ്ക്കുള്ള വിഭാഗത്തില് മികച്ച ചലച്ചിത്ര നിരൂപകനുള്ള പുരസ്കാരം സഞ്ജീവ് ശ്രീവാസ്തവയ്ക്കാണ്. മികച്ച സിനിമാ പുസ്തകത്തിനുള്ള പുരസ്കാരം ഡോ. പ്രദീപ് കെഞ്ചനൂരുവിന്റെ കൃതിക്കാണ്.
ഇന്ത്യന് സിനിമയിലെ പരമോന്നത ബഹുമതികളിലൊന്നായ ദാദാസാഹേബ് ഫാല്ക്കെ പുരസ്കാരം 2024 നടന് അനന്ത് നാഗിന് സമ്മാനിക്കും. അഞ്ച് പതിറ്റാണ്ടിലേറെ നീണ്ട സിനിമാ ജീവിതത്തിലെ സംഭാവനകള് പരിഗണിച്ചാണ് അദ്ദേഹത്തെ പുരസ്കാരത്തിന് തെരഞ്ഞെടുത്തത്. സെപ്റ്റംബര് 22ന് കെവാഡിയയില് നടക്കുന്ന ചടങ്ങിലാണ് പുരസ്കാരം സമ്മാനിക്കുക. ഈ വര്ഷം ദേശീയ ചലച്ചിത്ര പുരസ്കാര വിതരണച്ചടങ്ങ് ഡല്ഹിക്ക് പുറത്താണ് നടക്കുന്നത് എന്ന പ്രത്യേകതയുമുണ്ട്. ഭാവിയില് രാജ്യത്തെ വിവിധ സംസ്ഥാനങ്ങളിലും നഗരങ്ങളിലും ചടങ്ങ് സംഘടിപ്പിക്കുന്നതിനുള്ള തീരുമാനത്തിന്റെ ഭാഗമായാണ് ഗുജറാത്തിലെ ഏകതാ നഗറില് ചടങ്ങ് നടത്തുന്നത്.
