മണ്ണെടുത്ത ജീവിതങ്ങൾക്ക് കൈത്താങ്ങായി സിനിമാ മേഖലയിലെ പ്രമുഖർ. ഉരുൾപൊട്ടലിൽ ജീവിതം വഴിമുട്ടിയ കുടുംബങ്ങൾക്ക് 25 ലക്ഷം രൂപ മോഹൻലാൽ ധനസഹായം നൽകി. മുഖ്യമന്ത്രിയുടെ ദുരിതാശ്വാസ നിധി വഴിയാണ് അദ്ദേഹം ധനസഹായം കൈമാറിയത്.
നയൻതാരയും ദുരിത ബാധിതർക്ക് നേരെ സഹായ ഹസ്തം നീട്ടിയിരുന്നു. ദുരിതാശ്വാസ നിധിയിലേക്ക് താരം 20 ലക്ഷം രൂപ കൈമാറി. അവതാരിക പേളി മാണി 5 ലക്ഷം രൂപയും ദുരിത ബാധിതർക്ക് വീട് നിർമിച്ച് നൽകുന്നതിലേക്ക് സംഭാവന നൽകി. നിരവധി താരങ്ങളാണ് ഇത്തരത്തിൽ ദുരന്തത്തിൽ നിന്ന് തലനാരിഴയ്‌ക്ക് രക്ഷപ്പെട്ട് കഴിയുന്നവർക്കായി മുഖ്യമന്ത്രിയുടെ ദുരിതാശ്വാസ നിധിയിലേക്ക് ധനസഹായം കൈമാറിയത്.
വയനാട്ടിലെ രക്ഷാപ്രവർത്തനത്തിൽ നേരത്തെ മോഹൻലാൽ പങ്കുവച്ച പോസ്റ്റ് ഏറെ ശ്രദ്ധനേടിയിരുന്നു. വയനാട് ദുരന്തത്തിൽ നിസ്വാർത്ഥ പ്രവർത്തനം കാഴ്ചവയ്‌ക്കുന്ന സന്നദ്ധപ്രവർത്തകർക്കും, പൊലീസുകാർക്കും, ഫയർ ആൻഡ് റെസ്‌ക്യൂ ഉദ്യോഗസ്ഥർക്കും, എൻഡിആർഎഫ് ഉദ്യോഗസ്ഥർക്കും സൈനികർക്കും അദ്ദേഹം അഭിനന്ദനങ്ങൾ അറിയിച്ചിരുന്നു. മേഖലയിൽ അക്ഷീണം പ്രവർത്തിക്കുന്ന ഓരോ വ്യക്തികൾക്കും സല്യൂട്ട് നൽകുന്നുവെന്നും അദ്ദേഹം കുറിച്ചു. മുമ്പും വെല്ലുവിളികളെ അഭിമുഖീകരിച്ച് ശക്തരാകാൻ സാധിച്ചിട്ടുണ്ട്. ദുഷ്‌കരമായ ഈ സമയത്ത് ഒറ്റക്കെട്ടായി പ്രവർത്തിച്ച് ഒരുമയുടെ കരത്തുക്കാട്ടണമെന്നും അദ്ദേഹം സമൂഹമാദ്ധ്യമങ്ങൾ വഴി അഭ്യർത്ഥിച്ചിരുന്നു.
