തിരുവനന്തപുരം: സംസ്ഥാനത്തെ പ്രമുഖ സെലിബ്രിറ്റി മേക്കപ്പ് ആർട്ടിസ്റ്റുകളുടെ സ്ഥാപനങ്ങളിൽ നടത്തിയ റെയ്‌ഡിൽ കോടികളുടെ നികുതി വെട്ടിപ്പ് കണ്ടെത്തി ജിഎസ്ടി വകുപ്പ്. മേക്കപ്പ് ആർട്ടിസ്റ്റുകളുടെ 50 ൽ അധികം സ്ഥാപനങ്ങളിലും വീടുകളിലും പരിശോധന നടത്തിയതായും 32.51 കോടി രൂപയുടെ നികുതി വെട്ടിപ്പ് പ്രാഥമികമായി കണ്ടെത്തിയിട്ടുണ്ടെന്നും ജിഎസ്ടി വകുപ്പ് പുറത്തിറക്കിയ വാർത്താക്കുറിപ്പിൽ അറിയിച്ചു.
സംസ്ഥാന ജി എസ് ടി വകുപ്പിന്റെ ഇന്റലിജൻസ് വിഭാഗമാണ് ഓപ്പറേഷൻ ഗുവാപ്പൊ എന്ന പേരിൽ പ്രത്യേക പരിശോധന നടത്തിയത്. ഇവർ കഴിഞ്ഞ ഏതാനും മാസങ്ങളായി മേക്കപ്പ് ആർട്ടിസ്റ്റുകളുടെ സ്ഥാപനങ്ങളും വീടും നിരീക്ഷിച്ച് വരികയായിരുന്നു. ചൊവ്വാഴ്ച രാവിലെ ആറ് ഇടങ്ങളിൽ തുടങ്ങിയ പരിശോധന രാത്രി വൈകിയും പലയിടങ്ങളിലും തുടരുന്നതായാണ് വിവരം.
ഇന്റലിജൻസ് വിഭാഗത്തിനൊപ്പം എൻഫോഴ്‌സ്‌മെന്റ് ഉദ്യോഗസ്ഥരും പരിശോധനയിൽ പങ്കെടുത്തു. മേക്കപ്പ് ആർട്ടിസ്റ്റുകൾ സിലിബ്രിറ്റി മേക്കപ്പുകളിലൂടെയും മറ്റും ലഭിക്കുന്ന കോടികളുടെ വരുമാനത്തിന് നികുതി അടയ്‌ക്കാതെ വെട്ടിപ്പ് നടത്തുന്നതായി റെയ്‌ഡിൽ കണ്ടെത്തിയെന്ന് ഉദ്യോഗസ്ഥർ വ്യക്തമാക്കി.
