സമൃദ്ധിയുടെയും ഐശ്വര്യത്തിന്റെയും ഒരു പൊന്നിൻ ചിങ്ങം കൂടി എത്തിയിരിക്കുന്നു. കൊല്ലവർഷത്തിന്റെ ആദ്യ ദിവസമായ ഇന്ന്, കേരളക്കരയ്ക്ക് കർഷകദിനം കൂടിയാണ്. കൊയ്ത്തുപാട്ടുകൾ അലയടിച്ചിരുന്ന കേരളത്തിൽ ഇന്ന് അതിജീവനത്തിനായുള്ള പോരാട്ടമാണ് നടക്കുന്നത്. ഇതിന് ശക്തി പകർന്നു കൊണ്ട് പുതുവർഷ ആശംസകളുമായാണ് ഇപ്പോൾ നടൻ മോഹൻലാലും എത്തിയിരിക്കുന്നത്.
” പ്രതീക്ഷയുടെ പുലർവെട്ടവുമായി ചിങ്ങമെത്തി. പുതുവർഷം മാത്രമല്ല, പുതുനൂറ്റാണ്ട് (1200 ) കൂടിയാണ് പിറക്കുന്നത്.. പ്രകൃതിദുരന്തം നൽകിയ വേദനകളെ ഒറ്റക്കെട്ടായി നമ്മൾ അതിജീവിച്ച് കടന്നുപോവുകയാണ്. എങ്ങും സ്നേഹത്തിന്റെ പൂക്കൾ വിടരട്ടെ. ഹൃദയം നിറഞ്ഞ പുതുവർഷ ആശംസകൾ”- മോഹൻലാൽ കുറിച്ചു.
പ്രതീക്ഷയുടെ പുലർവെട്ടം നൽകുന്ന ചിങ്ങത്തെ വരവേറ്റതിന്റെ സന്തോഷം മോഹൻലാൽ സമൂഹമാദ്ധ്യമമായ ഫെയ്സ്ബുക്കിലൂടെയാണ് പങ്കുവച്ചത്. ഇതോടെ നിരവധി ആളുകളാണ് താരത്തിന് തിരിച്ചും ആശംസകൾ നേർന്ന് രംഗത്തെത്തിയത്.
കൊയ്ത്തും മെതിയുമായി ആഘോഷങ്ങളുടെ മലയാളമാസമാണ് ചിങ്ങം. കർക്കടകത്തിന്റെ വറുതിയിൽ നിന്ന് സമൃദ്ധിയുടെ നിറവിലേക്കുള്ള മാറ്റം കൂടിയാണ് ഇന്ന്. കേരളത്തിന്റെ ഉത്സവമായ ഓണത്തെ വരവേൽക്കുന്നതിനായുള്ള കാത്തിരിപ്പിലാണ് ഇപ്പോൾ മലയാളക്കര.
