കൊൽക്കത്ത: ആരോഗ്യപ്രവർത്തകരുടെ സുരക്ഷ ഉറപ്പാക്കാൻ സാധ്യമായതെല്ലാം ചെയ്യുമെന്ന് ഉറപ്പുനൽകി കേന്ദ്ര ആരോഗ്യമന്ത്രാലയം. കൊൽക്കത്തയിൽ ജൂനിയർ ഡോക്ടറെ ക്രൂരമായി കൊലപ്പെടുത്തിയതിൽ പ്രതിഷേധിച്ച് ഡോക്ടർമാർ രാജ്യവ്യാപകമായി പണിമുടക്ക് നടത്തുകയാണ്. ആരോഗ്യ പ്രവർത്തകരുടെ സുരക്ഷയ്ക്കായി നടപടികൾ നിർദ്ദേശിക്കാൻ ഒരു കമ്മിറ്റി രൂപീകരിക്കുമെന്ന് മന്ത്രാലയം ഔദ്യോഗിക പ്രസ്താവനയിൽ അറിയിച്ചു.
ഫെഡറേഷൻ ഓഫ് റസിഡൻ്റ് ഡോക്ടേഴ്സ് അസോസിയേഷൻ (FORDA), ഇന്ത്യൻ മെഡിക്കൽ അസോസിയേഷൻ IMA), ഡൽഹിയിലെ ഗവൺമെൻ്റൽ മെഡിക്കൽ കോളേജുകളിലെയും ആശുപത്രികളിലെയും റസിഡൻ്റ് ഡോക്ടേഴ്സ് അസോസിയേഷനുകളുടെ പ്രതിനിധികൾ എന്നിവർ ആരോഗ്യ മന്ത്രാലയത്തിലെ ഉദ്യോഗസ്ഥരുമായി നടത്തിയ കൂടിക്കാഴ്ചയ്ക്ക് ശേഷമാണ് ഉറപ്പ് ലഭിച്ചത്.
“ജോലിസ്ഥലത്തെ ആരോഗ്യ പ്രവർത്തകരുടെ സുരക്ഷ സംബന്ധിച്ച് അസോസിയേഷനുകൾ അവരുടെ ആവശ്യങ്ങൾ ഉന്നയിച്ചിട്ടുണ്ട്. കേന്ദ്ര ആരോഗ്യ കുടുംബക്ഷേമ മന്ത്രാലയം പ്രതിനിധികളുടെ ആവശ്യങ്ങൾ കേൾക്കുകയും സുരക്ഷ ഉറപ്പാക്കാൻ സാധ്യമായ എല്ലാ ശ്രമങ്ങളും അവർക്ക് ഉറപ്പ് നൽകുകയും ചെയ്തു,” മന്ത്രാലയം പ്രസ്താവനയിൽ പറഞ്ഞു.
സംസ്ഥാന സർക്കാരുകൾ ഉൾപ്പെടെ എല്ലാ പങ്കാളികളുടെയും പ്രതിനിധികളെ അവരുടെ നിർദ്ദേശങ്ങൾ കമ്മിറ്റിയുമായി പങ്കുവെയ്ക്കാൻ ക്ഷണിക്കും. വർദ്ധിച്ചുവരുന്ന ഡെങ്കിപ്പനി, മലേറിയ കേസുകൾ കണക്കിലെടുത്ത് സമരം ചെയ്യുന്ന ഡോക്ടർമാരോട് അവരുടെ ജോലി പുനരാരംഭിക്കണമെന്നും മന്ത്രാലയം അഭ്യർത്ഥിച്ചു.
