ന്യൂഡൽഹി: സിംഗപ്പൂർ വിദേശകാര്യ സെക്രട്ടറിയും സ്ഥിരം നിയമ സെക്രട്ടറിയുമായ ലൂക്ക് ഗോയുമായി കൂടിക്കാഴ്ച നടത്തി ഇന്ത്യയുടെ വിദേശകാര്യ സെക്രട്ടറി (ഈസ്റ്റ്) ജയ്ദീപ് മജുംദാർ. ഡൽഹിയിൽ നടന്ന കൂടിക്കാഴ്ചയിൽ ഉഭയകക്ഷി, പ്രാദേശിക വിഷയങ്ങളിലും പരസ്പര താൽപര്യമുളള രാജ്യാന്തര വിഷയങ്ങളിലും ഊന്നിയായിരുന്നു ചർച്ചകൾ.
വിദേശകാര്യ മന്ത്രാലയം വക്താവ് രൺധീർ ജയ്സ്വാൾ ആണ് ഇക്കാര്യം അറിയിച്ചത്. കഴിഞ്ഞ ജൂലൈയിൽ വിദേശകാര്യ മന്ത്രി എസ് ജയശങ്കർ സിംഗപ്പൂർ വിദേശകാര്യമന്ത്രി വിവിയൻ ബാലകൃഷ്ണനുമായി കൂടിക്കാഴ്ച നടത്തിയിരുന്നു. ലാവോസിൽ നടന്ന ആസിയാൻ സമ്മേളനത്തോടനുബന്ധിച്ചാണ് ഇരുവരും കൂടിക്കാഴ്ച നടത്തിയത്. ഇതിന്റെ തുടർച്ചയായിട്ടായിരുന്നു ഡൽഹിയിലെ ചർച്ചയെന്നാണ് വിവരം.
