തിരുപ്പതി : തിരുമല തിരുപ്പതി വെങ്കിടേശ്വര ക്ഷേത്രത്തിൽ ദർശനം നടത്തി തെലുങ്ക് സൂപ്പർ സ്റ്റാർ ചിരഞ്ജീവി. തന്റെ 69-ാം ജന്മദിനത്തോടനുബന്ധിച്ചാണ് താരം തിരുമലയിലെ ശ്രീ ബാലാജി സന്നിധിയിലെത്തിയത്. ഭാര്യ സുരേഖ കൊനിഡേലയും അമ്മയും അദ്ദേഹത്തോടൊപ്പം ഉണ്ടായിരുന്നു. വ്യാഴാഴ്ച രാവിലെയാണ് അദ്ദേഹം ക്ഷേത്ര ദർശനം നടത്തിയത്.
ചിരഞ്ജീവി ക്ഷേത്രദർശനം നടത്തുന്നതിന്റെ ചിത്രങ്ങളും വീഡിയോകളും ആരാധകർ സമൂഹമാദ്ധ്യമത്തിൽ പങ്കുവച്ചിട്ടുണ്ട്. പരമ്പരാഗത ഓഫ്-വൈറ്റ് സിൽക്ക് മുണ്ടും കുർത്തയും കസവു ബോർഡറുള്ള ഷോളും ധരിച്ചെത്തിയ അദ്ദേഹം ആരാധകരെ അഭിവാദ്യം ചെയ്ത ശേഷമാണ് ക്ഷേത്രത്തിലേക്ക് കടന്നത്. ക്ഷേത്ര ഭാരവാഹികൾ ഊഷ്മള സ്വീകരണമാണ് അദ്ദേഹത്തിന് നൽകിയത്.
1978-ൽ ‘പുനദിരല്ലു’ എന്ന ചിത്രത്തിലൂടെയാണ് ചിരഞ്ജീവിയുടെ സിനിമാജീവിതത്തിന് തുടക്കം കുറിക്കുന്നത്. തുടർന്ന് ‘വിജയ’, ‘ഇന്ദ്ര’, ‘ശങ്കർ ദാദ എംബിബിഎസ്’, ‘ഭോലാ ശങ്കർ’ തുടങ്ങി നിരവധി ഹിറ്റ് ചിത്രങ്ങളിൽ അദ്ദേഹം കേന്ദ്രകഥാപാത്രത്തെ അവതരിപ്പിച്ചു. സിനിമയിലെ അദ്ദേഹത്തിന്റെ സംഭാവനകളെ മാനിച്ച് കേന്ദ്രസർക്കാർ ഈ വർഷം ഇന്ത്യയിലെ രണ്ടാമത്തെ ഉയർന്ന സിവിലിയൻ ബഹുമതിയായ പത്മവിഭൂഷൺ നൽകി ആദരിച്ചിരുന്നു.
