ഹേമാ കമ്മിറ്റി റിപ്പോർട്ടിലുള്ള കാര്യങ്ങൾ സത്യമെന്ന് രണ്ട് ദിവസം മുൻപാണ് നടി ഉഷ ഹസീന പറഞ്ഞത് . മൊഴി നൽകിയിരിക്കുന്ന പെണ്കുട്ടികൾ പരാതി നൽകാൻ തയാറാകണമെന്നും ഉഷ പറഞ്ഞിരുന്നു. 32 വർഷങ്ങൾക്ക് മുൻപും ഇത്തരത്തിൽ കാര്യങ്ങൾ തുറന്ന് പറഞ്ഞ താരമാണ് ഉഷ . അതിന്റെ ദൃശ്യങ്ങളും പുറത്ത് വന്നിട്ടുണ്ട് . സിനിമയിൽ മാഫിയ സംഘമുണ്ടെന്നും , താൻ അപകടത്തിൽപ്പെട്ടുപോയിയെന്നും , ഇനി വരുന്നവർ ശ്രദ്ധിക്കണമെന്നുമാണ് ഉഷ വീഡിയോയിൽ പറയുന്നത് .
‘‘സിനിമയിൽ നല്ല അനുഭവമല്ല എനിക്കുണ്ടായത്. സിനിമയിലുള്ള ആൾക്കാരെ വിശ്വസിക്കാൻ പറ്റില്ല. ഇനി വരാൻപോകുന്ന കുട്ടികളോടും, ഇപ്പോൾ ഉള്ള കുട്ടികളോടും എനിക്ക് പറയാനുള്ളത് ശ്രദ്ധിച്ച് കൈകാര്യം ചെയ്യണമെന്നാണ്. സിനിമ എന്നുപറയുന്നത് മാഫിയ സംഘമാണ്. ബർമുഡ ട്രയാങ്കിളിൽ കൈരളി കപ്പൽ പെട്ട പോലെ. ഞാൻ അതിൽ പെട്ടു പോയി . എനിക്ക് അപകടം പറ്റി. അതിന്റെ അനുഭവത്തിൽ പറയുകയാണ്. കുട്ടികൾ വളരെ ശ്രദ്ധിച്ച് നിൽക്കണം . ഞാൻ ഒരാളേ വിശ്വസിച്ചു, കല്യാണം കഴിച്ചു താമസിക്കുകയായിരുന്നു. സുരേഷ് ബാബു എന്നാണ് പേര്. പിന്നീടാണ് എനിക്ക് മനസിലായത്. എന്നെ ഒരു ഭാര്യയായി പരിഗണിക്കാനായിരുന്നില്ല കല്യാണം കഴിച്ചത് . ചതിക്കപ്പെട്ടു എന്നും വളരെ വൈകിയാണ് മനസിലായത് ‘ – ഉഷ പറയുന്നു.
ഒപ്പം തന്റെ ആദ്യ ചിത്രത്തെ കുറിച്ചും , സമാനകാലത്തുണ്ടായിരുന്ന താരങ്ങളെ കുറിച്ചുമൊക്കെ ഉഷ പറയുന്നുണ്ട്.
