കൊച്ചി: പ്രശസ്ത സംവിധായകൻ എം. മോഹൻ അന്തരിച്ചു. 76 വയസായിരുന്നു. കൊച്ചിയിലെ സ്വകാര്യ ആശുപത്രിയിലായിരുന്നു അന്ത്യം. ആരോഗ്യ പ്രശ്നങ്ങളെ തുടർന്ന് ഏറെ കാലമായി അദ്ദേഹം ചികിത്സയിലായിരുന്നു. വിദേശത്തുള്ള മകനെത്തിയ ശേഷമാകും സംസ്കാരം.
മലയാള സിനിമയുടെ സുവർണ കാലഘട്ടമെന്നറിയപ്പെടുന്ന 80-കളിൽ വ്യക്തിമുദ്ര പതിപ്പിച്ചയാളാണ് എം. മോഹൻ. മധ്യവർഗ സിനിമകളിലൂടെ മലയാളിയുടെ അഭ്രപാളിയിൽ കാഴ്ച വിരുന്നൊരുക്കിയ സംവിധായകനാണ് യാത്രയാകുന്നത്.
രണ്ട് പെൺകുട്ടികൾ, ശാലിനി എന്റെ കൂട്ടുകാരി, വിടപറയുംമുൻപേ, മംഗളം നേരുന്നു, രചന, ആലോലം, ഒരു കഥ ഒരു നുണക്കഥ, ഇസബെല്ല, പക്ഷേ, സാക്ഷ്യം, അങ്ങനെ ഒരു അവധിക്കാലത്ത് തുടങ്ങി നിരവധി ശ്രദ്ധേയ ചിത്രങ്ങളുടെ സംവിധായകനാണ് മോഹൻ. അങ്ങനെ ഒരു അവധിക്കാലത്ത്, മുഖം, ശ്രുതി, ആലോലം വിടപറയും മുമ്പേ എന്നീ സിനിമകൾക്ക് തിരക്കഥ എഴുതിയിട്ടുണ്ട്.
