ജിയോ ഉപഭോക്താക്കൾക്ക് 100 ജിബി സൗജന്യ ക്ലൗഡ് സ്റ്റോറേജ് നൽകുന്ന ഓഫർ പ്രഖ്യാപിച്ച് മുകേഷ് അംബാനി. ജിയോ എഐ ക്ലൗഡ് വെൽക്കം ഓഫറാണ് റിലയൻസ് ചെയർമാൻ പ്രഖ്യാപിച്ചിരിക്കുന്നത്. ദീപാവലി മുതലാണ് ഓഫർ ലഭിക്കുക. റിലയൻസ് AGM 2024 പരിപാടിക്കിടെയാണ് ഇതുസംബന്ധിച്ച പ്രഖ്യാപനം മുകേഷ് അംബാനി നടത്തിയത്. ദശലക്ഷക്കണക്കിന് ജിയോ ഉപഭോക്താക്കൾക്ക് എഐ സാങ്കേതികവിദ്യയുടെ സഹായത്തോടെ സൗജന്യ ക്ലൗഡ് ആസ്വദിക്കാൻ അവസരമൊരുക്കുകയാണ് ജിയോ.
സുരക്ഷിതമായ ഒരു സെർവറിൽ ഡോക്യുമെന്റുകൾ, ഫയലുകൾ, ഫോട്ടോകൾ, എന്നിവ സേവ് ചെയ്ത് സൂക്ഷിക്കാനാണ് ക്ലൗഡ് സ്റ്റോറേജ് ഉപയോഗിക്കുന്നത്. നിലവിൽ ഗൂഗിൾ, ആപ്പിൾ എന്നിവയ്ക്ക് ക്ലൗഡ് സ്റ്റോറേജുകളുണ്ട്. എന്നിരുന്നാലും വളരെ കുറഞ്ഞ സ്റ്റോറേജ് മാത്രമാണ് സൗജന്യമായി നൽകുന്നത്. ഗൂഗളിന്റെ 130 രൂപയുടെ പ്രതിമാസ പ്ലാൻ എടുത്താൽ 100 ജിബി സ്റ്റോറേജ് ലഭിക്കും. 50 ജിബി ഐക്ലൗഡ് സ്റ്റോറേജിന് 75 രൂപയാണ് ആപ്പിൾ ഈടാക്കുന്നത്. ഈ സാഹചര്യത്തിലാണ് 100 ജിബിയുടെ സ്റ്റോറേജ് സൗജന്യമായി നൽകുമെന്ന ജിയോയുടെ പ്രഖ്യാപനം.
