ധാക്ക: ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീന ഇന്ത്യയിലിരുന്ന് നടത്തുന്ന രാഷ്‌ട്രീയ പരാമർശങ്ങൾക്കെതിരെ രൂക്ഷ വിമർശനവുമായി ഇടക്കാല സർക്കാരിനെ നയിക്കുന്ന മുഹമ്മദ് യൂനുസ്. ഷെയ്ഖ് ഹസീനയുടെ നീക്കങ്ങൾ ഒരിക്കലും ഇന്ത്യയ്‌ക്ക് ഗുണം ചെയ്യില്ലെന്നും, അസ്വാരസ്യങ്ങൾ ഉണ്ടാകാതിരിക്കാൻ ഷെയ്ഖ് ഹസീന നിശബ്ദത പാലിക്കുകയാണ് വേണ്ടതെന്നും മുഹമ്മദ് യൂനുസ് പറയുന്നു.
” ബംഗ്ലാദേശ് സർക്കാർ ആവശ്യപ്പെടുന്ന നിമിഷം ഇന്ത്യ അവരെ ഞങ്ങൾക്ക് കൈമാറണം. അതുവരെ ഇന്ത്യ അവരെ അവിടെ നിർത്താൻ ആഗ്രഹിക്കുന്നുണ്ടെങ്കിൽ അവർ നിശബ്ദത പാലിക്കുന്നതായിരിക്കും നല്ലത്. സൗഹാർദ്ദപരമല്ലാത്ത നീക്കമാണ് ഷെയ്ഖ് ഹസീനയുടെ ഭാഗത്ത് നിന്ന് ഉണ്ടാകുന്നത്. അവർ സംസാരിക്കുമ്പോൾ കൂടുതൽ പ്രശ്‌നങ്ങളിലേക്കാണ് കാര്യങ്ങൾ പോകുന്നത്.ഒരുപക്ഷേ അവർ മിണ്ടാതിരുന്നെങ്കിൽ ഞങ്ങൾ പലതും മറക്കാൻ ശ്രമിക്കുമായിരുന്നു. അവർ മറ്റേതോ ലോകത്തെന്ന പോലെയാണ് സംസാരിക്കുന്നതെന്നും” മുഹമ്മദ് യൂനുസ് വിമർശിച്ചു.
ബംഗ്ലാദേശിൽ നടന്നത് തീവ്രവാദ പ്രവർത്തനങ്ങളാണെന്നും, കുറ്റക്കാരെ കണ്ടെത്തി കർശനശിക്ഷ ഉറപ്പാക്കണമെന്നും ഷെയ്ഖ് ഹസീന പറഞ്ഞിരുന്നു, ഇതിനെതിരെയായിരുന്നു മുഹമ്മദ് യൂനുസിന്റെ വിമർശനം. ഹസീനയുടെ ഇത്തരം അഭിപ്രായപ്രകടനം ഒരിക്കലും ബംഗ്ലാദേശിനോ ഇന്ത്യയ്‌ക്കോ നല്ലതല്ലെന്നും മുഹമ്മദ് യൂനുസ് കൂട്ടിച്ചേർത്തു. വിഷയത്തിലുള്ള ബംഗ്ലാദേശിന്റെ നിലപാട് ഇന്ത്യയെ അറിയിച്ചിട്ടുണ്ടെന്നും മുഹമ്മദ് യൂനുസ് വ്യക്തമാക്കി.
” ജനങ്ങളെ പേടിച്ചാണ് ഷെയ്ഖ് ഹസീന പലായനം ചെയ്തത്. എന്നിട്ട് അവർ മറ്റൊരു രാജ്യത്തിരുന്ന് ബംഗ്ലാദേശിനെതിരെ സംസാരിക്കുകയാണ്. അവർ നിശബ്ദത പാലിക്കണമെന്ന് തന്നെയാണ് ഞങ്ങൾ എല്ലാവർക്കും ആവർത്തിച്ച് പറയാനുള്ളത്. അവരെ എത്രയും വേഗം ഇവിടെ എത്തിക്കാനുള്ള നടപടികൾ ആരംഭിക്കും. ജനങ്ങളുടെ മുന്നിൽ വച്ച് തന്നെ അവരുടെ വിചാരണ നടപ്പിലാക്കും. ഇന്ത്യയുമായി ഞങ്ങൾ നല്ല ബന്ധം ആഗ്രഹിക്കുന്നുണ്ടെങ്കിൽ ഷെയ്ഖ് ഹസീന അവിടെ തുടരുന്നത് ഇരുരാജ്യങ്ങളുടേയും ബന്ധത്തിന് അത്ര നല്ലതാകില്ലെന്നും” മുഹമ്മദ് യൂനുസ് പറഞ്ഞു.
