മലയാള സിനിമാ മേഖലയിൽ പുതിയ ചുവടുവെപ്പുമായി നടി ഹണി റോസ്. പിറന്നാൾ ദിനത്തിൽ പുതിയ പ്രൊഡക്ഷൻ കമ്പനിക്ക് തുടക്കം കുറിച്ചിരിക്കുകയാണ് താരം. എച്ച്ആർവി പ്രൊഡക്ഷൻസ് എന്നാണ് കമ്പനിയ്‌ക്ക് പേരിട്ടിരിക്കുന്നത്. കമ്പനിയുടെ ലോഗോ ഇൻസ്റ്റഗ്രാമിൽ പങ്കുവച്ചുകൊണ്ടാണ് പുതിയ ചുവടുവെപ്പിനെ കുറിച്ച് ഹണിറോസ് ആരാധകരെ അറിയിച്ചത്.
സിനിമാ മേഖലയിലേക്ക് വരാൻ ആഗ്രഹിക്കുന്ന മികച്ച പ്രതിഭകൾക്ക് അവസരം നൽകുന്നതിന് വേണ്ടിയാണ് തന്റെ ഈ സംരംഭമെന്ന് ഹണി റോസ് കുറിപ്പിൽ പറയുന്നു. രസകരമായ കഥകൾ പ്രേക്ഷകർക്ക് മുന്നിൽ കൊണ്ടുവരാനാണ് എച്ചആർവി പ്രൊഡക്ഷൻസിലൂടെ താൻ ലക്ഷ്യമിടുന്നതെന്നും ഹണി റോസ് വ്യക്തമാക്കി.
“സിനിമ എന്നത് പലരുടെയും സ്വപ്നമാണ്. ശരിക്കും അതൊരു ഫാന്റസിയാണ്. 20 വർഷത്തോളം മലയാള സിനിമാ മേഖലയുടെ ഭാഗമാകാൻ സാധിച്ചത് ഭാഗ്യമായാണ് ഞാൻ കാണുന്നത്. എന്റെ ജീവിതം മനോഹരമാക്കിയത് സിനിമയാണ്. അറിവും സൗഹൃദങ്ങളും ജീവിതവും എല്ലാം ലഭിച്ചത് സിനിമാ മേഖലയിൽ നിന്നാണ്.
എന്റെ ജന്മദിനവും അദ്ധ്യാപക ദിനവുമായ ഇന്ന് എന്റെ പ്രൊഡക്ഷൻ കമ്പനിയുടെ ലോഗോ നിങ്ങൾക്ക് മുന്നിൽ അവതരിപ്പിക്കാൻ ഞാൻ ആഗ്രഹിക്കുന്നു. പ്രേക്ഷകർ നൽകുന്ന സ്നേഹവും പിന്തുണയും എന്നും എനിക്കൊപ്പം ഉണ്ടാകണം. എന്റെ യാത്രയിൽ എന്നോടൊപ്പം ഉണ്ടായിരുന്ന എല്ലാവർക്കും നന്ദി അറിയിക്കുന്നു.
എച്ച് ആർ വി പ്രൊഡക്ഷൻസിലൂടെ കഴിവുള്ള കലാകാരന്മാർക്ക് അവസരം നൽകുകയും മലയാള സിനിമാ മേഖലയെ കൂടുതൽ ഉയരങ്ങളിലേക്ക് എത്തിക്കുന്നതിനായി പ്രവർത്തിക്കുകയും ചെയ്യും”- ഹണി റോസ് ഇൻസ്റ്റഗ്രാമിൽ കുറിച്ചു.
