തൂശനിലയിട്ട് ഓണസദ്യ ഉണ്ണേണ്ടേ? ഇക്കാര്യങ്ങൾ അറിഞ്ഞോളൂ..

പൂവിളികളുമായി മലയാളികൾക്ക് ഒരു പൊന്നോണക്കാലം കൂടി എത്തിയിരിക്കുന്നു. ഓണമെന്ന് പറയുമ്പോഴേ പൂക്കളവും ഓണസദ്യയും ഓണക്കോടിയുമൊക്കെയായിരിക്കും മനസിൽ വരുന്നത്. തൂശനിലയിൽ കറിവട്ടങ്ങളെല്ലാം വിളമ്പി ഗംഭീരമായ സദ്യ ഉണ്ണുന്നതിനായി കാത്തിരിക്കുകയാണ് മലയാളികൾ. എന്നാൽ സദ്യ അങ്ങനെ തോന്നുന്ന പോലെ കഴിക്കുന്നത് ശരിയായ രീതിയല്ല. അതിന് ചില ചിട്ടവട്ടങ്ങളുണ്ട്. അറിയാം..

സദ്യ വിളമ്പണ്ട രീതിയും കഴിക്കേണ്ട രീതിയും

തൂശനിലയിട്ടു കഴിഞ്ഞാൽ ആദ്യം വിളമ്പേണ്ടത് ഉപ്പാണ്. ഇതിന് പിന്നാലെ കായവറുത്തതും ശർക്കര വരട്ടിയും വിളമ്പും. പഴവും പപ്പടവും അടുത്തതായി ഇലയിൽ വയ്‌ക്കാം. ഇനി കറികൾ വിളമ്പാം. ഇഞ്ചിക്കറിയും അച്ചാറുകളും മധുരക്കറികളുമാണ് അടുത്ത വിഭവങ്ങൾ. ഇതിന് പിന്നാലെ അവിയലും തോരനും കാളനും വയ്‌ക്കാം. ഇതിനെല്ലാം ശേഷമാണ് ചോറ് വിളമ്പേണ്ടത്.

ചോറിന് മീതെ പരിപ്പും നെയ്യും വച്ചാൽ കഴിച്ച് തുടങ്ങാം. പരിപ്പും ചോറും പപ്പടവും ചേർത്ത് ആദ്യം കഴിക്കുക. പിന്നാലെ സാമ്പാറും ചോറും കഴിക്കണം. ഇവയ്‌ക്ക് ശേഷം അവിയലും എരിശേരിയും ചേർത്ത് ഉണ്ണണം, പിന്നാലെ എല്ലാ കറികളും കഴിക്കണം.

പിന്നീടാണ് പുളിശേരി കഴിക്കേണ്ടത്. ഇനി പായസം, പക്ഷേ ചോറ് അൽപ്പം ഇലയിൽ വയ്‌ക്കണം. കാരണം പായസം പഴം ചേർത്ത് കുടിച്ച് കഴിഞ്ഞാൽ, ഇവയെല്ലാം ദഹിപ്പിക്കാൻ അൽപം രസവും മോരും ചേർത്ത് ചോറ് കഴിക്കണം. ഇവയെല്ലാം കഴിച്ച് ഇല മടക്കും മുൻപ് അൽപം നാരങ്ങ അച്ചാറും നാക്കിൽ തൊടാം.

വിഭവങ്ങൾ

1)ചിപ്സ്
2) ശർക്കര വരട്ടി
3) പഴം
4) പപ്പടം
5) ഉപ്പ്
6) ഇഞ്ചിക്കറി
7)പാവയ്‌ക്ക കൊണ്ടാട്ടം
8) മുളക് കൊണ്ടാട്ടം
9) നാരങ്ങ അച്ചാർ
10) മാങ്ങ അച്ചാർ
11) വെള്ള കിച്ചടി
12) ഓലൻ
13) കാളൻ
14) ബീറ്റ്‌റൂട്ട് കിച്ചടി
15) വെള്ളരിക്കാ പച്ചടി
16) മാങ്ങാ പച്ചടി
17) പൈനാപ്പിൾ പച്ചടി
18) തോരൻ
19) അവിയൽ
20) എരിശേരി
21) പരിപ്പ്
22) നെയ്യ്
23) സാമ്പാർ
24) പുളിശ്ശേരി
25) അടപ്രഥമൻ
26) പാലട പായസം
27) സേമിയ പായസം
28) രസം
29) മോര്