ന്യൂഡൽഹി: തിരുവോണനാളിൽ മലയാളികൾക്ക് മലയാളത്തിൽ ഓണാശംസ നേർന്ന് പ്രധാനമന്ത്രി നരേന്ദ്ര മോദി. എക്സിൽ പങ്കുവച്ച പോസ്റ്റിലാണ് അദ്ദേഹം മലയാളത്തിൽ ആശംസ നേർന്നത്. എല്ലാവർക്കും സന്തോഷകരമായ ഓണം ആശംസിച്ച പ്രധാനമന്ത്രി കേരളത്തിന്റെ മഹത്തായ സംസ്കാരം ആഘോഷിക്കുന്ന ഉത്സവമാണ് ഓണമെന്നും കുറിച്ചു.
“ഏവർക്കും സന്തോഷകരമായ ഓണം ആശംസിക്കുന്നു. എങ്ങും സമാധാനവും സമൃദ്ധിയും ക്ഷേമവും ഉണ്ടാകട്ടെ. കേരളത്തിന്റെ മഹത്തായ സംസ്കാരം ആഘോഷിക്കുന്ന ഈ ഉത്സവം ലോകമെമ്പാടുമുള്ള മലയാളി സമൂഹം ആവേശത്തോടെ ആഘോഷിക്കുന്നു.” പ്രധാനമന്ത്രി കുറിച്ചു.
ആഭ്യന്തരമന്ത്രി അമിത്ഷായും കേരളീയർക്ക് ഓണാശംസകൾ നേർന്നു. മലയാളത്തിലായിരുന്നു അമിത്ഷായും ആശംസ കുറിച്ചത്. കാർഷിക സംസ്കൃതിയുടെ ഉത്സവമായ ഓണം പ്രകൃതിയുമായും സംസ്കാരവുമായും നമുക്കുള്ള ബന്ധം കൂടുതൽ ദൃഢമാക്കുന്നതോടൊപ്പം സന്തോഷവും ആരോഗ്യവും പ്രദാനം ചെയ്യട്ടെ എന്നായിരുന്നു അദ്ദേഹം ആശംസിച്ചത്.
