എറണാകുളം: കൊച്ചിയിലെ സ്വകാര്യ ഹോട്ടലിൽ പ്രൊഡക്ഷൻ കൺട്രോളർ മരിച്ച നിലയിൽ. സിനിമ- സീരിയൽ രംഗത്ത് പ്രൊഡക്ഷൻ കൺട്രോളറായി പ്രവർത്തിച്ചിരുന്ന ഷാനു ഇസ്മായിലിനെയാണ് മരിച്ച നിലയിൽ കണ്ടെത്തിയത്. വൈകിട്ട് മൂന്നിനായിരുന്നു സംഭവം. കഴിഞ്ഞ 10 ദിവസമായി ഷാനു ഹോട്ടലിലായിരുന്നു താമസിച്ചിരുന്നതെന്ന് ഹോട്ടൽ ഉടമ പറഞ്ഞു.
എല്ലാ ദിവസവും ഷാനു, മുറിക്ക് പുറത്തിറങ്ങുമായിരുന്നു. എന്നാൽ ഇന്ന് ഏറെ വൈകിയും ഷാനുവിനെ കാണാത്തതിനെ തുടർന്ന് ഹോട്ടൽ ജീവനക്കാർ നടത്തിയ പരിശോധനയിലാണ് ഇയാളെ മരിച്ച നിലയിൽ കണ്ടെത്തിയത്. ശുചിമുറിയിലായിരുന്നു മൃതദേഹം കിടന്നിരുന്നതെന്നും ഹോട്ടൽ അധികൃതർ പറഞ്ഞു. സംഭവത്തിൽ പൊലീസ് അന്വേഷണം ആരംഭിച്ചു.
ഹേമ കമ്മിറ്റി റിപ്പോർട്ട് പുറത്തുവിട്ടതിന് പിന്നാലെ തിരുവനന്തപുരം സ്വദേശിനിയായ നടിയുടെ ലൈംഗികാതിക്രമ പരാതിയിൽ ഷാനുവിനെതിരെ പൊലീസ് കേസെടുത്തിരുന്നു. സീരിയലിൽ അവസരം വാഗ്ദാനം ചെയ്ത് ഷാനു പീഡിപ്പിച്ചുവെന്നാണ് നടിയുടെ പരാതി.
