ബെയ്റൂട്ട് ; ഇസ്രായേൽ ആക്രമണത്തിൽ ഹിസ്ബുല്ല ഭീകരൻ ഹസൻ നസ്റല്ല കൊല്ലപ്പെട്ടതിൽ ജമ്മു കശ്മീരിൽ പ്രതിഷേധം . ബുദ്ഗാമിൽ നടന്ന പ്രതിഷേധ മാർച്ചിൽ സ്ത്രീകളും കുട്ടികളും ഉൾപ്പെടെ ഹിസ്ബുല്ല തലവന്റെ ഛായാചിത്രങ്ങൾ ഉയർത്തി പങ്കെടുത്തു .
ഹസൻ നസ്റല്ല കൊല്ലപ്പെട്ടതായി ഇസ്രായേൽ പ്രഖ്യാപിച്ചതിന് പിന്നാലെ ശൃംഗറിലെ പഴയ നഗരത്തിലും സംസ്ഥാനത്തിന്റെ മറ്റ് പ്രദേശങ്ങളിലും സമാനമായ പ്രതിഷേധങ്ങൾ നടന്നിരുന്നു . ജമ്മു കശ്മീർ മുൻ മുഖ്യമന്ത്രി മെഹബൂബ മുഫ്തി ഹസൻ നസ്റല്ലയുടെ കൊലപാതകത്തിൽ അപലപിച്ച് പീപ്പിൾസ് ഡെമോക്രാറ്റിക് പാർട്ടിയുടെ (പിഡിപി) നിയമസഭാ തെരഞ്ഞെടുപ്പിനുള്ള പ്രചാരണം നിർത്തി വയ്ക്കുന്നതായും പ്രഖ്യാപിച്ചു.
തന്റെ പാർട്ടി ലെബനനിലെയും ഗാസയിലെയും ജനങ്ങൾക്കൊപ്പമാണെന്ന് അവർ ഉറപ്പിച്ചു പറഞ്ഞു. ‘ ലെബനനിലെയും ഗാസയിലെയും രക്തസാക്ഷികളോട് പ്രത്യേകിച്ച് ഹസൻ നസ്റല്ലയോട് ഐക്യദാർഢ്യം പ്രകടിപ്പിച്ച് നാളെ എന്റെ കാമ്പയിൻ റദ്ദാക്കുന്നു. കനത്ത ദുഃഖത്തിന്റെയും ചെറുത്തുനിൽപ്പിന്റെയും ഈ മണിക്കൂറിൽ ഞങ്ങൾ പലസ്തീനിലെയും ലെബനനിലെയും ജനങ്ങൾക്കൊപ്പം നിൽക്കുന്നു, ”എന്നും അവർ ട്വീറ്റ് ചെയ്തു.
