വീണ്ടും ഒരു മമ്മൂട്ടി ചിത്രം കൂടി റീ റിലീസിന് ഒരുങ്ങുന്നു. അടുത്തിടെ റീ റിലീസ് ചെയ്ത മമ്മൂട്ടി ചിത്രം ‘പാലേരി മാണിക്യം: ഒരു പാതിരാകൊലപാതകത്തിന്റെ കഥ’ വൻ പരാജയമായി തീർന്നിരുന്നു. 15 വര്‍ഷത്തിന് ഇപ്പുറം 4കെ, അറ്റ്‌മോസിലേക്ക് റീമാസ്റ്റര്‍ ചെയ്യപ്പെട്ടാണ് സിനിമ വീണ്ടും തിയേറ്ററുകളിലേക്ക് എത്തിയത്. ഒക്ടോബര്‍ 4-ന് സിനിമ റീ റിലീസ് ചെയ്തു. എന്നാല്‍ സിനിമയുടെ റിലീസ് പലയിടത്തും മുടങ്ങി. സിനിമയുടെ ഒറ്റ ടിക്കറ്റ് പോലും വിറ്റ് പോകാതെ ആയതോടെയാണ് പലയിടങ്ങളിലും ഷോ ക്യാന്‍സലായത്. ഇതിന് പിന്നാലെ ‘ഒരു വടക്കൻ വീരഗാഥ’ കൂടി റീ റിലീസിന് എത്തുകയാണ്. മമ്മൂട്ടി തന്നെയാണ് ഇക്കാര്യം അറിയിച്ചിരിക്കുന്നത്.
‘മാറ്റിനി നൗ’ എന്ന യുട്യൂബ് ചാനലിലൂടെയാണ് ‘ഒരു വടക്കൻ വീരഗാഥ’ വീണ്ടും തിയേറ്ററുകളിൽ എത്തുന്ന കാര്യം മമ്മൂട്ടി പങ്കുവെച്ചത്. മമ്മൂട്ടിയുടെ വാക്കുകൾ ഇങ്ങനെ…
“മലയാള സിനിമയ്‌ക്കും, പ്രത്യേകിച്ച് എനിക്കും ഒരുപാട് നേട്ടങ്ങൾ സമ്മാനിച്ച സിനിമയാണ് ഒരു വടക്കൻ വീരഗാഥ. പ്രിയപ്പെട്ട എംടി തിരക്കഥ എഴുതി, ഹരിഹരൻ സാർ സംവിധാനം ചെയ്ത്, ഗൃഹലക്ഷ്മി പ്രൊഡക്ഷൻസ് നിർമ്മിച്ച 1984 റിലീസ് ചെയ്ത സിനിമ വീണ്ടും പുതിയ സാങ്കേതിക വിദ്യകളോടുകൂടി റിലീസ് ചെയ്യപ്പെടുകയാണ്”.
“സിനിമ 4-കെ അറ്റ്മോസിൽ റിലീസാവണം എന്ന് ഒരുപാട് ആഗ്രഹിച്ച ആളാണ് പിവിജി. ഞങ്ങൾ തമ്മിൽ ഒരുപാട് സംസാരിച്ചിരുന്നു അതിനെപ്പറ്റി. അന്ന് എന്തുകൊണ്ടും നടക്കാതെ പോയി. ഇന്ന് അദ്ദേഹത്തിന്റെ സ്വപ്നം മക്കൾ സാക്ഷാത്കരിക്കുകയാണ്”-മമ്മൂട്ടി പറഞ്ഞു.
