ചിരിയുടെ മാലപ്പടക്കം പൊട്ടിച്ച് ജയസൂര്യ നായകനായി എത്തിയ സിനിമകളായിരുന്നു ആട്, ആട്-2. മിഥുൻ മാനുവൽ തോമസിന്റെ സംവിധാനത്തിൽ പുറത്തിറങ്ങിയ സിനിമയുടെ ആദ്യ ഭാഗത്തിന് വേണ്ട വിധത്തിൽ ജനശ്രദ്ധ ലഭിച്ചെങ്കിലും രണ്ടാം ഭാഗം തിയേറ്ററുകളിൽ വമ്പൻ ഹിറ്റായി. ചിത്രത്തിന് മൂന്നാം ഭാഗം വേണമെന്നായിരുന്നു പിന്നീട് ആരാധകരുടെ ആവശ്യം. ആരാധകരുടെ അഭ്യർത്ഥനകൾ കണക്കിലെടുത്ത് ആട്- 3 വരുന്നുവെന്ന സന്തോഷ വാർത്തയാണ് ഇപ്പോൾ സമൂഹമാദ്ധ്യമങ്ങളിൽ ഇടംപിടിക്കുന്നത്.
സംവിധായകൻ മിഥുൻ മാനുവൽ തോമസിന്റെ ഫേസ്ബുക്കിലൂടെയാണ് ഇക്കാര്യം പുറത്തുവിട്ടത്. ‘ ആട്-3 വൺ ലാസ്റ്റ് റൈഡ്’ എന്നാണ് ചിത്രത്തിന് പേരിട്ടിരിക്കുന്നത്. ‘ വിദൂര ഭൂതകാലത്തിലേക്ക്, വിദൂര ഭാവിയിലേക്ക്, പ്രക്ഷുബ്ധമായ വർത്തമാനത്തിലൂടെയുള്ള സർഫിംഗ്. ഒടുവിൽ അവർ ഏറെ ആഗ്രഹിച്ച ‘ ലാസ്റ്റ് റൈഡിന്’ ഒരുങ്ങുകയാണ്”.. എന്ന അടിക്കുറിപ്പോടെയാണ് മിഥുൻ ആട്- 3 പ്രഖ്യാപിച്ചത്. മേശപ്പുറത്തിരിക്കുന്ന ലാപ്പിൽ തിരക്കഥയുടെ ആദ്യ പേജിന്റെ ചിത്രവും അദ്ദേഹം പങ്കുവച്ചു.
ജയസൂര്യ, വിനായകൻ, സണ്ണിവെയ്ൻ, സൈജു കുറുപ്പ്, അജു വർഗീസ്, ഇന്ദ്രൻസ് ഉൾപ്പെടെയുള്ള താരങ്ങൾ ചിത്രത്തിൽ പ്രധാന വേഷത്തിലെത്തുന്നു. ജയസൂര്യയുടെ ഷാജി പാപ്പൻ എന്ന കഥാപാത്രത്തിനും സൈജു കുറുപ്പിന്റെ അറയ്ക്കൽ അബു എന്ന കഥാപാത്രത്തിനും സിനിമാ പ്രേമികൾക്കിടയിൽ വളരെയധികം സ്വീകാര്യത ലഭിച്ചിരുന്നു.
