ലോകത്തിലെ തന്നെ ഏറ്റവും വലിയ തപാൽ സംവിധാനമാണ് ഇന്ത്യൻ പോസ്റ്റൽ സർവീസ്. എന്നാൽ കടലിനടിയിൽ തപാൽ സംവിധാനമുള്ള ഒരു രാജ്യം ഉണ്ട്. വെള്ളത്തിനടിയിൽ പോസ്റ്റ് ബോക്സോ? ഞെട്ടിയോ! എന്നാൽ അങ്ങനെ ഒന്നുണ്ട്, അങ്ങ് ജപ്പാനിൽ. സുസാമി ബേയിൽ തീരത്ത് നിന്ന് 10 മീറ്റർ ആഴത്തിൽ സ്ഥാപിച്ചിരിക്കുന്ന ഒരു പോസ്റ്റ്ബോക്സ്.
കടൽത്തീരത്ത് അറിയപ്പെടുന്ന ഒരു അണ്ടർവാട്ടർ പോസ്റ്റ്ബോക്സ് ആയ സുസാമി എന്ന ഈ പട്ടണം ഏകദേശം 174.71 ചതുരശ്ര കിലോമീറ്റർ വിസ്തൃതി ഉൾക്കൊള്ളുന്നു. ഇവിടെ ഏകദേശം അയ്യായിരത്തോളം ആളുകൾ താമസിക്കുന്നു. അവർക്ക് മറ്റിടങ്ങളിലേക്ക് കത്ത് അയക്കാനാണ് കടലിനടിയിൽ ഒരു പോസ്റ്റ് ബോക്സ് സ്ഥാപിച്ചത്. ഇതിലൊക്കെ ആര് കത്ത് ഇടാൻ, അല്ലേ! ഇങ്ങനെ ചിന്തിക്കാൻ വരട്ടെ. ഓരോ ദിവസവും ഏകദേശം 1,000 മുതൽ 1,500 വരെ കത്തുകൾ ഇതിൽ വരാറുണ്ട്.
പ്രദേശത്ത് താമസിക്കുന്നവർ അവരുടെ കുടുംബാംഗങ്ങൾക്കും പ്രിയപ്പെട്ടവർക്കുമായി ഇതിൽ കത്തുകൾ അയച്ചിടുന്നു. ഓയിൽ അധിഷ്ഠിത പെയിൻ്റ് മാർക്കറുകളുടെ സഹായത്തോടെ സന്ദേശം എഴുതിയ വാട്ടർ പ്രൂഫ് കാർഡുകളാണ് ഈ പോസ്റ്റ് ബോക്സിൽ നിക്ഷേപിക്കുന്നത്. അതിനാൽ വെള്ളത്തിനടിയിൽ മുങ്ങിയിട്ടും കാർഡിൽ സന്ദേശം കേടുകൂടാതെയിരിക്കും.
ആളുകൾ അവരുടെ മെയിൽ പോസ്റ്റുചെയ്യാൻ കടലിലേക്ക് മുങ്ങുന്നു. ഈ പ്രവർത്തനത്തിൽ ഏർപ്പെടുന്ന നിരവധി ആളുകൾക്ക് ഇത് ആവേശകരമായ അനുഭവമാണ്. സുസാമി ബേയ്ക്ക് പ്രത്യേക ശ്രദ്ധ നൽകാനുള്ള ശ്രമത്തിന്റെ ഭാഗമായി 1999-ൽ നടന്ന ഒരു മേളയിലാണ് അണ്ടർവാട്ടർ പോസ്റ്റ്ബോക്സ് നിലവിൽ വന്നത്. 70 വയസ്സുള്ള തോഷിഹിക്കോ മാറ്റ്സുമോട്ടോ എന്ന അന്നത്തെ പോസ്റ്റ്മാസ്റ്ററാണ് ഈ ആശയം മുന്നോട്ടുവച്ചത്.
