ഭൂമിയിൽ ജീവിച്ചിരിക്കുന്ന ഏറ്റവും വലിയ പ്രാണിയുടെ തല പുനഃസൃഷ്ടിച്ച് ശാസ്ത്രജ്ഞർ. അട്ടയുടെയും പഴുതാരയുടെയും ശരീരഘടനയോട് സാമ്യമുള്ള ആർത്രോപ്ലൂറ എന്ന ഭീമാകാരൻ പ്രാണിയുടെ തലയാണ് വീണ്ടും സൃഷ്ടിച്ചത്. ഏകദേശം 290 ദശലക്ഷം വർഷങ്ങൾക്ക് മുൻപ് ഈ ബഗ്ഗുകൾ യൂറോപ്പിലും വടക്കേ അമേരിക്കയിലും ജീവിച്ചിരുന്നുവെന്നാണ് ഗവേഷകരുടെ കണ്ടെത്തൽ.
കാർബോണിഫറസ് കാലഘട്ടത്തിൽ ഭൂമിയിലെ അന്തരീക്ഷ ഓക്സിജന്റെ അളവ് ക്രമാതീതമായി വർദ്ധിച്ചു. ഇത് ചില സസ്യങ്ങളുടെയും പ്രാണികളുടെയും വലിപ്പം വർധിക്കാൻ കരണമായെന്നാണ് ശാസ്ത്രജ്ഞർ പറയുന്നത്. ഇക്കാലഘട്ടത്തിൽ ഉണ്ടായിരുന്ന പ്രാണികളിലൊന്നാണ് ആർത്രോപ്ലൂറ. ഈ ഭീമാകാരൻ പ്രാണിക്ക് 24 ശരീരഭാഗങ്ങളും 88 കാലുകളുമുണ്ട്. ഇവ ജീർണിച്ച സസ്യങ്ങളെയാണ് ഭക്ഷണമാക്കുന്നത്. പകൽ സമയം ഭൂരിഭാഗവും ഇവ ഭക്ഷണം കഴിക്കാനാണ് സമയം കളയുന്നത്.
പൂർണ വളർച്ചയെത്തുന്ന ആർത്രോപ്ലൂറയ്ക്ക് ഒരു കാറിന്റെ വലിപ്പമെങ്കിലും ഉണ്ടാകും. ഞണ്ട്, പഴുതാര, തേൾ, അട്ട, എന്നിവയുൾപ്പെടുന്ന ആർത്രോപോഡ ജീവി വിഭാഗത്തിലാണ് ഇവയും ഉൾപ്പെടുന്നത്. ദിനോസറുകളെയും മാമത്തുകളെയും പോലെ ഒരു കാലത്ത് കരയിൽ ജീവിച്ചിരുന്ന ഏറ്റവും വലിയ ആർത്രോപോഡയിരുന്നു ആർത്രോപ്ലൂറ ബഗ്ഗുകളെന്ന് ശാസ്ത്രജ്ഞർ പറയുന്നു.
1854 മുതൽ പലയിടങ്ങളിൽ നിന്നും ഇവയുടെ ഫോസിലുകൾ ലഭിച്ചിരുന്നു. എന്നാൽ ഇവയ്ക്ക് തലഭാഗം ഉണ്ടായിരുന്നില്ല. എന്നാൽ കേടുപാടുകൾ സംഭവിയ്ക്കാത്ത തലകളോടുകൂടിയ രണ്ട് ആർത്രോപ്ലൂറ ഫോസിലുകൾ ഫ്രാൻസിൽ കണ്ടെത്തിയതോടെയാണ് ഇവയുടെ വ്യക്തമായ ശരീരഘടന ശാസ്ത്രജ്ഞർക്ക് ലഭിച്ചത്.
