ഭൂമിയുടെ ചക്രവാളത്തിന് മുകളിൽ സൂര്യൻ ഉദിക്കുന്നത് കണ്ട് ഒരു ചൂടുകാപ്പി കുടിക്കുന്ന ആഢംബരമായ ജീവിതം എപ്പോഴെങ്കിലും നിങ്ങൾ സ്വപ്നം കണ്ടിട്ടുണ്ടോ? സയൻസ് ഫിക്ഷൻ സിനിമകളിൽ മാത്രമേ ഇത് കാണാൻ സാധിക്കുകയുള്ളൂവെന്നാണ് നിങ്ങൾ ചിന്തിക്കുന്നതെങ്കിൽ വൈകാതെ ഇത്തരം സ്വപ്നം യാഥാർത്ഥ്യമാകുമെന്നാണ് ബഹിരാകാശ സ്റ്റാർട്ടപ്പ് ആയ വാസ്റ്റ് സ്പേസ് പറയുന്നത്.
ആദ്യത്തെ വാണിജ്യ ബഹിരാകാശനിലയമായ ഹാവൻ-1 പദ്ധതി ഏകദേശം പൂർത്തിയായെന്ന സന്തോഷവാർത്തയാണ് ഇപ്പോൾ സ്റ്റാർട്ടപ്പ് പങ്കുവച്ചിരിക്കുന്നത്. ഹാവൻ-1 ന്റെ ഫൈനൽ ഡിസൈൻ ആണ് ഗവേഷകർ പങ്കുവച്ചത്. അതിശയിപ്പിക്കുന്ന ഇന്റീരിയർ വർക്കുകളും മറ്റ് സവിശേഷതകളും അടങ്ങിയ, നിലയത്തിന്റെ അന്തിമ രൂപകൽപ്പനയുടെ വീഡിയോയാണ് വാസ്റ്റ് സ്പേസ് പുറത്തുവിട്ടത്.
2025 ഓഗസ്റ്റോടെ ഹാവൻ- 1 വിക്ഷേപിക്കാൻ സാധിക്കുമെന്നും വാസ്റ്റ് സ്പേസ് പറഞ്ഞു. പുറത്തുവിട്ട ഡിസൈൻ പ്രകാരം, ഭൂമിയുടെ മനോഹാരിത ആസ്വദിക്കുന്നതിനായി ബഹിരാകാശ നിലയത്തിൽ ഒരു നിരീക്ഷണ ഡെസ്ക് നൽകിയിട്ടുണ്ട്. സീറോ ഗ്രാവിറ്റിയിൽ നിർമിച്ച വിശ്രമ മുറികൾ, വ്യായാമം ചെയ്യുന്നതിനായുള്ള മുറികൾ തുടങ്ങിയവയുമാണ് ഹാവൻ-1 ന്റെ മറ്റ് സവിശേഷതകൾ.
