മുൻപ് ഇഷ്ടത്തോടെ കഴിച്ചിരുന്ന ഭക്ഷണം മുന്നിലെത്തിയിട്ടും കഴിക്കാൻ പറ്റാത്ത അവസ്ഥ ഉണ്ടായിട്ടുണ്ടോ? ഭക്ഷണം കാണുമ്പോൾ ഇത്തരം പേടിയും അസ്വസ്ഥതയും തോന്നുന്നുവെങ്കിൽ അത് നിസാരവൽക്കരിച്ച് കാണേണ്ടന്നാണ് ആരോഗ്യ വിദഗ്ധർ പറയുന്നത്. ശരിയല്ലാത്ത ഭക്ഷണ ശീലങ്ങൾ മൂലമുണ്ടാകുന്ന Avoidant/restrictive food intake disorder (AFRID) എന്ന രോഗാവസ്ഥയിലൂടെയാണ് ഇത്തരക്കാർ കടന്നുപോകുന്നതെന്ന് പഠനങ്ങൾ പറയുന്നു.
കുട്ടികളെന്നോ മുതിർന്നവരെന്നോ വ്യത്യസമില്ലാതെ ഈ രോഗാവസ്ഥ ആരിലും കടന്നുവന്നേക്കാം. AFRID-നെ സെലക്ടീവ് ഈറ്റിംഗ് ഡിസോർഡർ എന്നും വിളിക്കാം. ചില പ്രത്യേക നിറം, രുചി, മണം എന്നിവയുള്ള ഭക്ഷണപദാർത്ഥങ്ങൾ കഴിക്കുന്നതിൽ നിന്ന് വിട്ടുനിൽക്കുന്ന ഒരു പ്രത്യേക സ്വഭാവരീതി ഇതിന്റെ ലക്ഷണങ്ങളിൽ ഉൾപ്പെടും. ഇത്തരം തെരഞ്ഞെടുത്ത ഭക്ഷണ ക്രമങ്ങൾ ജീവൻ തന്നെ അപകടത്തിലാക്കാമെന്നാണ് പഠനങ്ങൾ പറയുന്നത്.
ലക്ഷണങ്ങൾ കണ്ടെത്തിയാൽ AFRID എത്രയും വേഗം ചികിത്സിച്ച് ഭേദമാക്കേണ്ടുന്ന രോഗമാണ്. അല്ലാത്തപക്ഷം ശരീരത്തിന് ആവശ്യമായ പോഷകങ്ങൾ ലഭിക്കാത്ത സ്ഥിതിയിലേക്കും മറ്റ് സങ്കീർണ രോഗാവസ്ഥകൾക്കുമിത് കാരണമാകും. കുട്ടികളിൽ സാധാരണമാണെങ്കിലും മുതിർന്നവരിൽ വിഷാദരോഗം ബാധിച്ചവരിൽ AFRID വരാനുള്ള സാധ്യത കൂടുതലാണ്. മലബന്ധം, വയറുവേദന തുടങ്ങിയവ AFRID ന്റെ പൊതുവായ ലക്ഷണങ്ങളാണ്. AFRID ഉള്ള ആളുകൾക്ക് ശരീരഭാരം ക്രമാതീതമായി കുറയാറുണ്ട്. ലക്ഷണങ്ങൾ ശ്രദ്ധയിൽ പെട്ടാൽ എത്രയും പെട്ടന്നുതന്നെ ആവശ്യമായ ചികിത്സ ഉറപ്പാക്കണമെന്ന് ആരോഗ്യ വിദഗ്ധർ പറയുന്നു.
