തിരുവനന്തപുരം: നവരാത്രി ദിനത്തിൽ തിരുവനന്തപുരം അമ്മത്തൊട്ടലിൽ പുതിയ അതിഥി എത്തി. പെൺകുഞ്ഞിന് ‘നവമി’യെന്ന് പേരിട്ടതായി അധികൃതർ അറിയിച്ചു. പുലർച്ചെയാണ് പുതിയ അതിഥിയുടെ വരവറിയിച്ച് മണിമുഴങ്ങിയത്. ദിവസങ്ങൾ മാത്രം പ്രായമായ കുഞ്ഞ്, ഡോക്ടർമാരുടെ നിരീക്ഷണത്തിലാണ്.
തിരുവനന്തപുരം അമ്മത്തൊട്ടിലിൽ ലഭിക്കുന്ന 609-ാമത്തെ കുഞ്ഞാണ് നവമി. കഴിഞ്ഞ തിങ്കളാഴ്ചയും അമ്മത്തൊട്ടിലിൽ പെൺകുഞ്ഞിനെ ലഭിച്ചിരുന്നു. കുട്ടിക്ക് ഒലിവ എന്നാണ് പേരിട്ടത്. ഈ ആഴ്ച തന്നെ സംസ്ഥാന ശിശുക്ഷേമ സമിതിയുടെ പക്കലെത്തുന്ന രണ്ടാമത്തെ പെൺകുഞ്ഞ് കൂടിയാണ് നവമി.
കുട്ടിയെ വിദഗ്ധ ആരോഗ്യ പരിശോധനയ്ക്കായി തൈക്കാട് ആശുപത്രിയിലേക്കും പിന്നീട് എസ് എ റ്റി ആശുപത്രിയിലേക്കും മാറ്റി. കുട്ടിയുടെ ദത്തെടുക്കൽ നടപടി ക്രമങ്ങൾ ആരംഭിക്കുമെന്ന് അധികൃതർ പറഞ്ഞു. ഇതിന് മുൻപായി അവകാശികൾ ആരെങ്കിലും ഉണ്ടെങ്കിൽ സമിതി അധികൃതരുമായി ബന്ധപ്പെടണമെന്ന് ജനറൽ സെക്രട്ടറി ജി.എൽ. അരുൺഗോപി വ്യക്തമാക്കി.
