സ്റ്റീൽ ടംബ്ലറിലേക്ക് അരിച്ചിറങ്ങുന്ന കടുപ്പൻ കാപ്പിയിലേക്ക് തിളപ്പിച്ച പാലും പഞ്ചസാരയും ചേർത്ത് നുരവരുത്തിയ കിടിലൻ ഫിൽട്ടർ കോഫി. പക്ക സൗത്ത് ഇന്ത്യൻ. ഏതൊരു ദക്ഷിണേന്ത്യക്കാരന്റെയും വികാരമാകും ഈ ഫിൽട്ടർ കോഫി. ലോകത്തിലെ ഏറ്റവും മികച്ച പത്ത് കാപ്പികളുടെ ടേസ്റ്റ് അറ്റലസ് പട്ടികയിൽ രണ്ടാം സ്ഥാനം സ്വന്തമാക്കിയിരിക്കുകയാണ് ഈ കോഫി. സ്വാദിനപ്പുറം ഉണ്ടാക്കുന്ന രീതിയിലും ലോകത്തെ തന്നെ ഞെട്ടിക്കുകയും അംഗീകാരത്തിന് കാരണമാവുകയും ചെയ്തു.
വളരെ രസകരമായാണ് ഫിൽറ്റർ കോഫി ഉണ്ടാക്കുന്നതെന്ന് ടേസ്റ്റ് അറ്റലസ് അഭിപ്രായപ്പെടുന്നു. ഫിൽറ്റർ കോഫി മെഷീനിന്റെ മുകളിലത്തെ തട്ടിൽ കാപ്പിപ്പൊടി നിറച്ച് നന്നായി അമർത്തി മൂടുന്നു. ഇതിലേക്ക് തിളപ്പിച്ച വെള്ളമൊഴിച്ച് അടച്ച് വയ്ക്കും. മുകളിലത്തെ തട്ടിൽ നിന്ന് കറുകിയ കാപ്പി സുഗന്ധം പരത്തി താഴേക്ക് അരിച്ചിറങ്ങും. ‘ഡബറ’ എന്ന സോസറിൽ വച്ച ചെറിയ സ്റ്റീൽ ടംബ്ലറിലേക്ക് പകരുന്നു. രുചിക്ക് അനുസൃതമായി പാലും പഞ്ചസാരയും ചേർത്ത് ആറ്റിയൊഴിച്ചെടുക്കാം. ലോകത്ത് തന്നെ ഇങ്ങനെയൊരു കാപ്പി ഉണ്ടാക്കൽ അപൂർവ്വമാണ്. സ്വാദും മണവുമെല്ലാം തികച്ചും വ്യത്യസ്തം. കാപ്പിയുടെ സത്ത് പാലും വെള്ളവുമായി ചേരുമ്പോൾ ഇത്രയേറെ അത്ഭുതം സംഭവിക്കുമെന്ന് തിരിച്ചറിയുന്ന നിമിഷമാകും ഫിൽറ്റർ കോഫി നുണയുന്ന നിമിഷം. ഗ്രീസിലെ എസ്പ്രെസോ ഫ്രെഡോ ( Espresso Freddo), ഇറ്റാലിയൻ കപ്പുച്ചിനോ (Cappuccin), ടർക്കിഷ് കോഫി തുടങ്ങിയ ലോകപ്രശസ്തമായ കാപ്പിരുചികളുടെ പട്ടികയിൽ ദക്ഷിണേന്ത്യൻ ഫിൽറ്റർ കോഫിയും താരമാണ്.
പരമ്പരാഗത രുചി വൈവിധ്യങ്ങളെ കുറിച്ച് ഗവേഷണം നടത്തുന്ന ഓൺലൈൻ യാത്ര ഗൈഡാണ് ടേസ്റ്റ് അറ്റ്ലസ്. ക്യൂബയുടെ എസ്പ്രെസോ (espresso) ആണ് പട്ടികയിൽ ഒന്നാമത്. വിയറ്റ്നാമീസ് ഐസ്ഡ് കോഫി, ഗ്രീസിലെ ഫ്രാപ്പെ (Frappe), ജർമ്മനിയിലെ ഐസ്കാഫി എന്നിവയുൾപ്പെടെ ശ്രദ്ധേയമായ മറ്റ് കോഫികളും ടേസ്റ്റ്അറ്റ്ലസ് പട്ടികപ്പെടുത്തിയിട്ടുണ്ട്.
