കാലാവസ്ഥ മാറുന്നതിനനുസരിച്ച് കഴിക്കേണ്ട ഭക്ഷണങ്ങളിൽ ശ്രദ്ധ കേന്ദ്രീകരിക്കേണ്ടത് അത്യന്താപേക്ഷിതമാണ്. വേനൽക്കാലങ്ങളിൽ കഴിക്കേണ്ട ആഹാരങ്ങൾ ശൈത്യകാലത്ത് കഴിക്കുന്നത് ശരീരത്തിന് അത്ര നല്ലതല്ല. കാരണം കാലാവസ്ഥയിലുണ്ടാകുന്ന മാറ്റത്തിനനുസരിച്ച് ശരീരത്തിൽ എത്തേണ്ട പോഷകഘടകങ്ങളിലും മാറ്റങ്ങൾ വരുത്തേണ്ടതുണ്ട്.
പ്രതിരോധശേഷി, സുഗമമായ ദഹനം, മെച്ചപ്പെട്ട ആരോഗ്യം എന്നിവയൊക്കെ കാലാവസ്ഥയെ ആശ്രയിച്ചാണിരിക്കുന്നത്. വേനൽക്കാലത്ത് പോഷക ഘടകങ്ങൾ നിറഞ്ഞ ഭക്ഷണങ്ങൾ വേണം കഴിക്കാൻ. തണുപ്പുകാലങ്ങളിൽ വിറ്റാമിനുകൾ, ആന്റിഓക്സിഡന്റുകൾ എന്നിവ അടങ്ങിയ ഭക്ഷണങ്ങൾ കഴിക്കുന്നത് ആരോഗ്യത്തിന് നല്ലതാണെന്നാണ് ചില പഠനങ്ങൾ വ്യക്തമാക്കുന്നത്. തണുപ്പുകാലത്ത് ഇവ കഴിച്ചുനോക്കൂ.
മത്തങ്ങ
ബീറ്റാ കരോട്ടിൻ ധാരാളം അടങ്ങിയിട്ടുള്ള പച്ചക്കറിയിനമാണ് മത്തങ്ങ. വിറ്റാമിൻ എയും ആന്റിഓക്സിഡൻുകളും മത്തങ്ങയിൽ അടങ്ങിയിട്ടുണ്ട്. ഇത് രോഗപ്രതിരോധത്തിനും ചർമ സംരക്ഷണത്തിനും സഹായിക്കുന്നു. ഇത് സാലഡിൽ ചേർത്തോ വറുത്തോ കഴിക്കാവുന്നതാണ്.
മധുരനെല്ലിക്ക
ആൻ്റിഓക്സിഡൻ്റുകളാൽ സമ്പന്നമാണ് മധുരനെല്ലിക്ക. ഇവ മൂത്രാശയ രോഗങ്ങളുടെ സാധ്യതകൾ ഇല്ലാതാക്കുകയും കൊളസ്ട്രോളിന്റെ അളവ് കുറയ്ക്കുകയും ചെയ്യുന്നു. ഹൃദയാരോഗ്യത്തിനും മധുരനെല്ലിക്ക ഉപയോഗപ്രദമാണ്. സലാഡ്, ഓട്സ് എന്നിവയിൽ ചേർത്ത് കഴിക്കാം.
കോളിഫ്ലവർ
ഫൈബറുകൾ, വിറ്റാമിൻ C, K എന്നിവ ധാരാളം അടങ്ങിയിട്ടുള്ള പച്ചക്കറിയാണ് കോളിഫ്ലവർ. തണുപ്പുകാലത്ത് കോളിഫ്ലവർ കഴിക്കുന്നത്, ആരോഗ്യത്തിന് ഉത്തമമാണ്. ഇത് രോഗപ്രതിരോധ ശേഷി വർദ്ധിപ്പിക്കുന്നതിനും എല്ലുകളുടെ ആരോഗ്യത്തിനും സഹായിക്കുന്നു. രുചി കിട്ടുന്നതിനായി കോളിഫ്ലവർ വറുത്തോ, ആവിയിൽ വേവിച്ചോ കഴിക്കാവുന്നതാണ്.
മാതളനാരങ്ങ
മാതളനാരങ്ങയിൽ ധാരാളം ആൻ്റിഓക്സിഡൻ്റ്, വിറ്റാമിൻ സി എന്നിവ അടങ്ങിയിട്ടുണ്ട്. ഇത് ശൈത്യകാലത്ത് കഴിക്കുന്നത് ഉത്തമമായിരിക്കും. മാതളനാരങ്ങ കഴിക്കുന്നതിലൂടെ ഹൃദ്രോഗം ഉൾപ്പെടെയുള്ള വിട്ടുമാറാത്ത രോഗങ്ങളുടെ സാധ്യത കുറയ്ക്കാനും സഹായിക്കുന്നു.
