കാനഡ: ഖലിസ്ഥാൻ ഭീകരർ കാരണം കാനഡയിലെ ഹിന്ദു സമൂഹത്തിലെ ആളുകൾ തങ്ങളുടെ സുരക്ഷയെ കുറിച്ച് ആശങ്കപ്പെടുന്നുവെന്ന് കനേഡിയൻ പാർലമെന്റ് അംഗം ചന്ദ്ര ആര്യ. ഖലിസ്ഥാൻ ഭീകരരുടെ ആക്രമണങ്ങൾ തടയാൻ പ്രധാനമന്ത്രി ജസ്റ്റിൻ ട്രൂഡോ നടപടി സ്വീകരിക്കണമെന്നും അദ്ദേഹം അഭ്യർത്ഥിച്ചു. എക്‌സിലൂടെയായിരുന്നു ചന്ദ്ര ആര്യ ഇക്കാര്യങ്ങൾ വ്യക്തമാക്കിയത്.
”സമീപകാലങ്ങളിൽ കാനഡയിൽ ഖലിസ്ഥാൻ വിഘടനവാദികളുമായി ബന്ധപ്പെട്ട് നിരവധി സംഭവങ്ങൾ അരങ്ങേറി. ഹിന്ദുക്കൾക്കെതിരായ ഖലിസ്ഥാൻ ഭീകരപ്രവർത്തനങ്ങൾ ആശങ്കയുണ്ടാക്കുന്നതാണ്. ഹിന്ദു സമൂഹത്തിൽ നിന്നും ഇത്തരം ആശങ്കകൾ കേൾക്കാൻ ഇടയായിട്ടുണ്ട്.
കഴിഞ്ഞ ആഴ്ച, ഒരു കൂട്ടം ഖാലിസ്ഥാനി പ്രതിഷേധക്കാർ എനിക്കെതിരെയും പ്രകടനം നടത്തി. സുരക്ഷാ ഉദ്യോഗസ്ഥരുടെ സംരക്ഷണത്തിലാണ് എഡ്മന്റണിലെ ഒരു ഹിന്ദു പരിപാടിയിൽ ഞാൻ പങ്കെടുത്തത്.”- ചന്ദ്ര ആര്യ കുറിച്ചു.
കാനഡക്കാരുടെ ജീവനും സ്വത്തിനും സർക്കാർ സുരക്ഷ ഒരുക്കണം. ഭീകരവാദ പ്രവർത്തനങ്ങൾക്ക് തടയിടാനുള്ള നടപടികൾ സ്വീകരിക്കണമെന്നും ചന്ദ്ര ആര്യ വ്യക്തമാക്കി. കാനഡയിലെ ഇന്ത്യൻ നയതന്ത്ര ഉദ്യോഗസ്ഥരെ ചോദ്യം ചെയ്യാനുള്ള കാനഡയുടെ വിവാദ നീക്കത്തെ തുടർന്ന് ഇരുരാജ്യങ്ങളും നയതന്ത്രജ്ഞരെ പരസ്പരം പുറത്താക്കിയിരുന്നു. എന്നാൽ ഇത്തരം പ്രശ്‌നങ്ങൾ പരിഹരിക്കാൻ ഇരുരാജ്യങ്ങളും ശ്രമിക്കണമെന്നും അദ്ദേഹം ആവശ്യപ്പെട്ടു.
ഇന്ത്യയും കാനഡയും പരസ്പരം സഹകരിച്ച് പ്രവർത്തിക്കാൻ തയ്യാറാവണം. ഖലിസ്ഥാനി വിഘടനവാദികൾ ഉയർത്തുന്ന ഭീഷണികൾ തിരിച്ചറിഞ്ഞ് ഭീകരവാദത്തെ പ്രതിരോധിക്കാനുള്ള ഫലപ്രദമായ മാർഗങ്ങൾ കണ്ടെത്തണമെന്നും ആര്യ ചന്ദ്ര പറഞ്ഞു. രാജ്യത്തെ ഏറ്റവും വിദ്യാസമ്പന്നരും കാനഡയുടെ പുരോഗതിക്കായി നിരവധി സംഭവാനകൾ നൽകുന്നവരുമാണ് ഹിന്ദു സമുദായത്തിലുള്ളവർ. എന്നാൽ ഹിന്ദുക്കൾക്കെതിരായ നീക്കങ്ങളാണ് കാനഡയിൽ നടക്കുന്നതെന്നും ഇതിൽ സർക്കാർ ഇടപെടണമെന്നും അദ്ദേഹം ആവശ്യപ്പെട്ടു.
