വയനാട്: വയനാട് ലോക്‌സഭാ മണ്ഡലത്തിലെ തെരഞ്ഞെടുപ്പ് പ്രചാരണത്തിന് തുടക്കം കുറിച്ച് എൻഡിഎ സ്ഥാനാർത്ഥി നവ്യ ഹരിദാസ്. ലക്കിടിയിലുള്ള കരിന്തണ്ടൻ സ്മാരകത്തിൽ പുഷ്പാർച്ചന ചെയ്ത ശേഷം കൽപ്പറ്റ പുതിയ ബസ്റ്റാൻഡിൽ നിന്നാണ് നവ്യ റോഡ് ഷോ ആരംഭിച്ചത്.
സാധാരണ ജനങ്ങൾക്കിടയിൽ പ്രവർത്തിച്ച് അവരുടെ മനസറിഞ്ഞ നേതാവിനെ കാണാനായി നൂറ് കണക്കിന് ബിജെപി പ്രവർത്തകരും ജനങ്ങളുമാണ് തടിച്ചു കൂടിയത്. തുറന്ന ജീപ്പിൽ ജനങ്ങൾക്കിടയിലേക്കെത്തിയ നവ്യ ഹരിദാസിനെ പുഷ്പഹാരം അണിയിച്ചും പൂച്ചെണ്ടുകൾ നൽകിയും പ്രവർത്തകർ ഗംഭീര വരവേൽപ്പ് നൽകി.
വയനാട് ലോക്‌സഭാ തെരഞ്ഞെടുപ്പിൽ ബിജെപിക്ക് വലിയ വിജയ പ്രതീക്ഷയാണുള്ളതെന്ന് നവ്യ ഹരിദാസ് പറഞ്ഞു. ജനങ്ങളുടെ ഭാഗത്ത് നിന്നും മികച്ച സ്വീകരണമാണ് ലഭിക്കുന്നതെന്നും അവരുടെ ഉത്സാഹവും ഊർജ്ജവും കൂടുതൽ ആത്മവിശ്വാസം നൽകുന്നുവെന്നും നവ്യ പറഞ്ഞു.
വയനാട്ടിൽ വീണ്ടും തെരഞ്ഞെടുപ്പ് വരാൻ കാരണം രാഹുലും അദ്ദേഹത്തിന്റെ കുടുംബവുമാണ്. രാഹുൽ ജനങ്ങളെ വഞ്ചിച്ച് പോയതാണ്. വീണ്ടും അദ്ദേഹത്തിന്റെ കുടുംബത്തിൽ നിന്നും മറ്റൊരാൾ എത്തുമ്പോൾ വാക്ക് തെറ്റിച്ചത് പാലിക്കാൻ സാധിക്കുമോയെന്ന ആശങ്ക ജനങ്ങൾക്കിടയിലുണ്ടെന്നും നവ്യ വ്യക്തമാക്കി.
നവംബർ 13നാണ് കേളത്തിൽ ഉപതെരഞ്ഞെടുപ്പ് നടക്കുന്നത്. വയനാടിന് പുറമെ പാലക്കാട് ചേലക്കര നിയോജക മണ്ഡലത്തിലും തെരഞ്ഞെടുപ്പ് നടക്കും. 23നാണ് വോട്ടെടുപ്പ്.
