സാഹസികമായി ഫോട്ടോയെടുക്കാൻ ശ്രമിക്കുന്നത് പലപ്പോഴും അപകടങ്ങൾ വിളിച്ചു വരുത്താറുണ്ട്. ഇത്തരത്തിൽ നിരവധി വാർത്തകൾ ഓരോ ദിവസവും വരുന്നു. അങ്ങനെയൊരു സംഭവമാണ് ഓസ്ട്രേലിയയിൽ നിന്നും ഇപ്പോൾ റിപ്പോർട്ട് ചെയ്യുന്നത്. ഒക്ടോബർ 12-ന് ഓസ്ട്രേലിയയിലെ ഹണ്ടർ വാലി മേഖലയിൽ ഫോട്ടോ എടുക്കാൻ ശ്രമിക്കവെ ഒരു സ്ത്രീ അപകടത്തിൽപ്പെട്ടതാണ് സംഭവം.
മട്ടിൽഡ കാംബെൽ എന്ന 23 കാരിയാണ് സാഹസികമായി ഫോട്ടോ എടുക്കുന്നതിനിടെ ഭീമൻ പാറകൾക്കിടയിലെ വിള്ളലിനുള്ളിൽ വീണത്. പാറകൾക്കിടയിലുള്ള ഇടുങ്ങിയ വിള്ളലിൽ തലകീഴായാണ് യുവതി പെട്ടത്. ഇതിന്റെ ചിത്രമാണ് ഇന്റർനെറ്റിൽ പ്രത്യക്ഷപ്പെട്ടത്. വിള്ളലിൽ കാലുകൾ മാത്രം കാണാവുന്ന രീതിയിലാണ് ചിത്രം.
ഏകദേശം10 അടി നീളമുള്ള വിള്ളലിൽ നിന്നും യുവതിയെ രക്ഷിക്കാനുള്ള വെല്ലുവിളി നിറഞ്ഞ ദൗത്യം ഏഴ് മണിക്കൂർ നീണ്ടു. വളരെ സാഹസികമായാണ് ഇവരെ രക്ഷപ്പെടുത്തിയത്. തന്റെ പതിറ്റാണ്ട് നീണ്ട ഔദ്യോഗിക ജീവിതത്തിൽ ഇതുപോലൊരു ദൗത്യം ആദ്യമായാണെന്ന് സ്പെഷ്യലിസ്റ്റ് റെസ്ക്യൂ പാരാമെഡിക്കായ പീറ്റർ വാട്ട്സ് പറഞ്ഞു. അപകടമുണ്ടാകാത്ത രീതിയിൽ പാറകൾ ചെറുതായി പൊട്ടിച്ചാണ് യുവതിയെ പുറത്തെടുത്തത്.
