വിശ്വപ്രസിദ്ധമായ മണ്ണാറശാല ആയില്യം മഹോത്സവം ഇന്ന്; ജില്ലയിൽ പ്രാദേശിക അവധി

ഹ​രി​പ്പാ​ട്: മ​ണ്ണാ​റ​ശാ​ല നാ​ഗ​രാ​ജാ ക്ഷേ​ത്ര​ത്തി​ലെ പ്രശസ്തമായ ആ​യി​ല്യം മ​ഹോ​ത്സ​വം ഇ​ന്ന്. പാരമ്പര്യവിധി പ്രകാരം ആയില്യം നാളിൽ ക്ഷേത്ര ശ്രീകോവിലിൽ പൂജകൾക്ക് നേതൃത്വ വഹിക്കുന്നത് കുടുംബകാരണവരാണ്. കു​ടും​ബ​കാ​ര​ണ​വ​ർ എം.​കെ. പ​ര​മേ​ശ്വ​ര​ൻ ന​മ്പൂ​തി​രി​യു​ടെ മു​ഖ്യ​കാ​ർ​മി​ക​ത്വ​ത്തി​ൽ നാ​ഗ​രാ​ജാ​വി​നും സ​ർ​പ്പ​യ​ക്ഷി​ക്കും തി​രു​വാ​ഭ​ര​ണം ചാ​ർ​ത്തി​യു​ള്ള പൂ​ജ​ ആരം​ഭി​ക്കും. അഭിഷേകം, ഉഷപൂജ, കലശാഭിഷേകം എന്നിവയ്‌ക്ക് ശേഷമാകും ഇത്.

രാ​വി​ലെ എ​ട്ടി​ന് വ​ലി​യ​മ്മ സാ​വി​ത്രി അ​ന്ത​ർ​ജ​നം മ​ണ്ണാ​റ​ശാ​ല ഇ​ല്ല​ത്തെ പു​രാ​ത​ന നി​ല​വ​റ​യു​ടെ തെ​ക്കേ​ത്ത​ള​ത്തി​ൽ ഭ​ക്ത​ർ​ക്ക് ദ​ർ​ശ​നം ന​ൽ​കും. ഉച്ചപൂജയ്‌ക്ക് ശേഷം നിലവറയോട് ചേർന്ന തളത്തിൽ ശംഖ്, കുരവ എന്നിവയുടെ അകമ്പടിയോടെ ആയില്യം പൂജയ്‌ക്കായി നാഗപത്മക്കളം വരയ്‌ക്കും. കളംപൂർത്തിയാകുമ്പോൾ അമ്മ തീർത്ഥകുളത്തിൽ കുളിച്ച് ക്ഷേത്രത്തിലേക്കെത്തും. ഇളയമ്മയും കുടുംബത്തിലെ ഏറ്റവും മുതിർന്ന കാരണവന്മാരും അമ്മയെ അനു​ഗമിക്കും. അമ്മ് ശ്രീകോവിലിൽ പ്രവേശിച്ച ശേഷം കുത്തുവിളക്കിലേക്ക് ദീപം പകരും.

തുടർന്ന് അമ്മ നാഗരാജാവിന്റെ വാസുകീ ഭാവത്തിലുള്ള തിരുവാഭരണവും നാഗഫണവും ഇളയമ്മ സർപ്പയക്ഷി അമ്മയുടെയും കാരണവന്മാർ നാഗചാമുണ്ഡിയമ്മ, നാഗയക്ഷിയമ്മ വിഗ്രഹങ്ങളുമായി ക്ഷേത്രത്തിന് വലംവച്ച് ഇല്ലത്തേക്കെത്തുന്ന ആയില്യം എഴുന്നള്ളത്ത് നടക്കും. തട്ടിന്മേൽ നൂറുംപാലും നടക്കുന്നതോടെ ചടങ്ങുകൾ പൂർത്തിയാകും. രാവിലെ പത്ത് മണി മുതൽ മഹാപ്രസാദമൂട്ട് ആരംഭിക്കും. ഇന്നലെ ആയിരങ്ങളാണ് പൂയം തൊഴാൻ എത്തിയത്‌.

ആയില്യം മഹോത്സവം പ്രമാണിച്ച് ആലപ്പുഴ ജില്ലയിലെ എല്ലാ സര്‍ക്കാര്‍ ഓഫീസുകള്‍ക്കും വിദ്യാഭ്യാസ സ്ഥാപനങ്ങള്‍ക്കും ഒക്ടോബർ 26ന് ജില്ലാ കളക്ടർ പ്രാദേശിക അവധി പ്രഖ്യാപിച്ചു. മുൻകൂട്ടി നിശ്ചയിച്ച പൊതുപരീക്ഷകൾക്ക് അവധി ബാധകമല്ല.