കോഴിക്കോട്: അക്യുപങ്ചർ സ്ഥാപനത്തിലെ ജീവനക്കാരിയോട് ലൈംഗികാതിക്രമം നടത്തിയ അദ്ധ്യാപകനെ ജോലിയിൽ നിന്ന് സസ്പെൻഡ് ചെയ്തു. പേരാമ്പ്ര NIM LP സ്കൂളിലെ അറബിക് അദ്ധ്യാപകൻ ജസീലിനെയാണ് മാനേജ്മെന്റ് സസ്പെൻഡ് ചെയ്തത്. സംഭവത്തിൽ ജസീലിനെതിരെ നടപടി എടുക്കണമെന്ന് ആവശ്യപ്പെട്ട് യുവമോർച്ച പ്രതിഷേധം സംഘടിപ്പിച്ചിരുന്നു.
പേരാമ്പ്ര ചാലിക്കരയിൽ സ്ഥിതിചെയ്യുന്ന അക്യുപങ്ചർ സ്ഥാപനത്തിലെ ജീവനക്കാരിയോട് ജസീൽ മോശമായി പെരുമാറിയെന്നാണ് ആരോപണം. കഴിഞ്ഞ മാസം 19നായിരുന്നു ആരോപണത്തിന് ആസ്പദമായ സംഭവം നടന്നത്. സ്ഥാപനത്തിലെത്തിയ ജസീൽ മുറിയിലേക്ക് കടന്ന് വാതിൽ ലോക്ക് ചെയ്ത് ജീവനക്കാരിക്കെതിരെ ലൈംഗികാതിക്രമം നടത്തിയെന്നാണ് പരാതി. ഇക്കാര്യം ചൂണ്ടിക്കാട്ടി പേരാമ്പ്ര പൊലീസിന് യുവതി പരാതി നൽകിയിരുന്നു.
