ദീപാവലി കഴിഞ്ഞേയുള്ളൂ.. ഉത്സവസീസൺ ആയതിനാൽ നിറയെ മധുരം കഴിക്കുന്നത് സ്വാഭാവികമാണ്. എണ്ണമയം കൂടിയ പലഹാരങ്ങളും ആൽക്കഹോൾ അടങ്ങിയ പാനീയങ്ങളും തോന്നിയ നേരത്തുള്ള ഭക്ഷണം കഴിക്കലും ഒക്കെ ഈയൊരു സമയത്ത് പതിവാകും. അതും ഇതും വാരിത്തിന്ന് ദഹനമില്ലാതെയായി മലബന്ധവും പിടിച്ച് ഇരിപ്പാണെങ്കിൽ മരുന്ന് കഴിക്കാതെ തന്നെ മാറ്റാൻ ചില വഴികളിതാ..
ഫൈബർ
ധാരാളം ഫൈബർ അടങ്ങിയ ഭക്ഷണം വേണ്ടുവോളം കഴിക്കുക. ഫൈബർ കൂടുതലുള്ള പഴങ്ങൾ, പച്ചക്കറികൾ, ധാന്യങ്ങൾ, പയർവർഗങ്ങൾ എന്നിവ ആഹാരത്തിൽ ഉൾപ്പെടുത്തുക. നാരുകളടങ്ങിയ ഭക്ഷണം കഴിക്കുന്നത് മലബന്ധം മാറാനും കുടലിലെ പ്രക്രിയകൾ എളുപ്പമാക്കാനും സഹായിക്കും. ഉണങ്ങിയ പ്ലം (Prune), അത്തിപ്പഴം (figs), ബെറീസ് എന്നിവ കഴിക്കുന്നത് നല്ലതാണ്.
വെള്ളം
ധാരാളം വെള്ളം കുടിക്കുക. മെച്ചപ്പെട്ട ദഹനത്തിന് വെള്ളം വേണ്ടുവോളം കുടിക്കേണ്ടത് അത്യാവശ്യമാണ്. ഒരു ദിവസം 8-10 ഗ്ലാസ് വെള്ളമെങ്കിലും കുടിക്കുക. ഇഞ്ചിച്ചായ കുടിക്കുന്നതും നല്ലതാണ്.
മഗ്നീഷ്യം
ഇലക്കറികൾ ധാരാളം കഴിച്ച് ശരീരത്തിലേക്ക് എത്തുന്ന മഗ്നീഷ്യത്തിന്റെ അളവ് കൂട്ടുക. നട്സ്, സീഡ്സ്, വാഴപ്പഴം എന്നിവ കഴിക്കുന്നതും ആവശ്യമായ മഗ്നീഷ്യം നൽകും.
കൊഴുപ്പ്
ശരീരത്തിലേക്ക് നല്ല കൊഴുപ്പ് അടങ്ങിയ ആഹാരം എത്തിക്കുക. ഒലിവ് ഓയിൽ, അവക്കാഡോ, നട്സ്, സീഡ്സ് എന്നിവ ആഹാരത്തിൽ ഉൾപ്പെടുത്തുന്നത് കുടലിനെ ലൂബ്രിക്കേറ്റ് ചെയ്യാൻ സഹായിക്കുകയും ദഹനം എളുപ്പമാക്കുകയും ചെയ്യും.
ദേഹമനങ്ങണം
ചെറിയ രീതിയിലെങ്കിലും വ്യായാമം ചെയ്യുക. നടക്കാൻ പോവുക, യോഗ ചെയ്യുക എന്നിവ പരീക്ഷിക്കാം.
ഇത്രയും കാര്യങ്ങൾ ഒരു നാല് ദിവസം തുടർച്ചയായി ശ്രദ്ധിച്ചാൽ തന്നെ മലബന്ധത്തിന് ആശ്വാസം ലഭിക്കും.
