ചുമ്മാതങ്ങ് ഇട്ട് പൊട്ടിച്ചാൽ പോരാ.. വലുപ്പത്തിൽ കുഞ്ഞനാണെങ്കിലും ​ഗുണത്തിൽ വമ്പനാണേ..

വലുപ്പത്തിന്റെ പേരിൽ കുറച്ചുകാണുന്ന ഒന്നാണ് കടുക്. കടുകുമണിയോളം വലുപ്പമെന്ന് ഇടയ്‌ക്കിടെ പറയാറുണ്ട്. എന്നാൽ ​ഗുണങ്ങളുടെ കാര്യത്തിൽ കടുക് നിസാരക്കാരനല്ലെന്ന് വേണം പറയാൻ. ഒരു ടീസ്പൂൺ കടുക് കഴിക്കുന്നത് നാല് കലോറി കുറയ്‌ക്കാമെന്നാണ് ​പഠനത്തിൽ പറയുന്നത്. കടുകെണ്ണ ശരീരത്തിലെ മെറ്റബോളിസം വർ‌ദ്ധിപ്പിക്കുന്നു. ഭക്ഷണത്തിന്റെ രുചി വർദ്ധിപ്പിക്കുന്നതിനൊപ്പം നിറയെ ​ഗുണങ്ങളും കടുക് നൽകുന്നു. അവയിൽ ചിലത് ഇതാ…

• കാൻസറിന് കാരണമാകുന്ന കോശങ്ങളുടെ വളർച്ചയെ തടയുന്ന ഗ്ലൂക്കോസിനോലേറ്റുകൾ, മൈറോസിനേസ് തുടങ്ങിയ സംയുക്തങ്ങൾ കടുകിലുണ്ട്. അതിനാൽ കടുക് ഉപയോ​ഗം അർബുദ സാധ്യത കുറയ്‌ക്കുന്നു.
• തലവേദന, മൈഗ്രേൻ എന്നിവയ്‌ക്കും കടുക് നല്ലതാണ്. ഇവയിൽ അടങ്ങിയിരിക്കുന്ന മഗ്നീഷ്യം നാഡീവ്യവസ്ഥയെ ശാന്തമാക്കുന്നു. ശരീരത്തിന്റെ വിവിധ ഭാഗങ്ങളിൽ അനുഭവപ്പെടുന്ന വേദന ശമിപ്പിക്കുന്നു.
• ദഹന വ്യവസ്ഥയ്‌ക്കും കടുക് ​ഗുണം ചെയ്യുന്നു. നാരുകളാൽ സമ്പന്നമാണിത്. പതിവായി കടുക് കഴിക്കുന്നത് മലബന്ധം തടയാനും ഗുണം ചെയ്യും. കൂടാതെ ദഹനം മെച്ചപ്പെടുത്തുകയും പോഷകങ്ങൾ ആഗിരണം ചെയ്യാനും കടുക് സഹായിക്കും.
• കടുകിൽ മഗ്നീഷ്യം അടങ്ങിയിട്ടുള്ളതിനാൽ ഹോർമോൺ ബാലൻസ് ചെയ്യാൻ സഹായിക്കും. ആർത്തവവേദന അകറ്റാനും ഫലപ്രദമാണ്.
• ഒമേഗ – 3, ഒമേഗ -6 ഫാറ്റി ആസിഡുകൾ എന്നിവ കടുകിൽ ധാരാളം അടങ്ങിയിട്ടുണ്ട്. നല്ല കൊളസ്‌ട്രോൾ അളവ് കൂട്ടാൻ ഇത് സഹായിക്കുന്നു. പതിവായി കടുക് കഴിക്കുന്നത് ഹൃദയാരോഗ്യം മെച്ചപ്പെടുത്തും.
• കാൽസ്യം, മ​ഗ്നീഷ്യം മാംഗനീസ്, ഫോസ്‌ഫറസ്, തുടങ്ങിയവ അടങ്ങിയിട്ടുള്ളതിനാൽ എല്ലുകളെയും പല്ലുകളെയും ബലപ്പെടുത്തുന്നു.
• ആൻ്റി-ഇൻഫ്ലമേറ്ററി ​ഗുണങ്ങളുള്ള സെലിനിയം എന്ന സംയുക്തം കടുകിൽ അടങ്ങിയിട്ടുണ്ട്. ഇച് ആസ്ത്മയ്‌ക്കും ശ്വസന സംബന്ധമായ പ്രശ്നങ്ങൾക്കും പരിഹാരമാണ്.
• ഇതിലെ സൾഫർ ചർമത്തിന് ആരോ​ഗ്യം നൽകുന്നു. മുഖക്കുര, ഫം​ഗൽ അണുബാധ എന്നിവയിൽ നിന്ന് സംരക്ഷണമേകുന്നു. ചർമത്തിലെ ജലാംശം നിലനിർത്തുന്നു.
• വിറ്റാമിൻ എ, പ്രോട്ടീൻ എന്നിവ തലമുടിയുടെ വളർച്ചയ്‌ക്ക് സഹായിക്കുന്നു. കടുകെണ്ണ തേക്കുന്നത് നല്ലതാണ്.
• വിറ്റാമിൻ കെ, വിറ്റാമിൻ എ, വിറ്റാമിൻ സി എന്നിവ അടങ്ങിയിട്ടുള്ളതിനാൽ യുവത്വം നിലനിർത്താൻ സഹായിക്കുന്നു.