നടൻ സൂര്യയുടെ ബ്രഹ്‌മാണ്ഡ ചലച്ചിത്രമായ കങ്കുവ സമ്മിശ്ര പ്രതികരണങ്ങളുമായി തിയേറ്ററുകളിൽ പ്രദർശനം തുടരുകയാണ്. 350 കോടി രൂപ ചെലവഴിച്ചൊരുക്കിയ സിനിമ പ്രതീക്ഷയ്‌ക്കൊത്ത് ഉയർന്നില്ലെന്ന വിമർശനങ്ങൾ ആരാധകരുടെ ഭാഗത്ത് നിന്ന് ഉയരുമ്പോൾ കങ്കുവയ്‌ക്ക് പിന്തുണയുമായി എത്തിയിരിക്കുകയാണ് സൂര്യയുടെ ഭാര്യയും നടിയുമായ ജ്യോതിക.
സൂര്യയുടെ ഭാര്യ എന്ന നിലയിലല്ല സിനിമാ ആസ്വാദക എന്ന നിലയിലാണ് താൻ ഇത് എഴുതുന്നതെന്നും പറഞ്ഞുള്ള കുറിപ്പാണ് അവർ സമൂഹമാദ്ധ്യമങ്ങളിൽ പങ്കുവച്ചത്. ചിത്രത്തിന്റെ ആദ്യ അര മണിക്കൂർ പ്രതീക്ഷിച്ചത്ര ഉയർന്നില്ല. എന്നാൽ സിനിമ മൊത്തത്തിൽ ഗംഭീര കാഴ്ചാനുഭവമാണ്. സൂര്യയെ കുറിച്ചോർത്ത് ഞാൻ അഭിമാനിക്കുന്നു. ചിത്രത്തിന്റെ ആദ്യത്തെ കുറച്ച് രംഗങ്ങളിൽ ശബ്ദം വളരെ ഉയർന്നതാണ്. അത് മാറ്റി നിർത്തിയാൽ കങ്കുവ വളരെ ഗംഭീരമായ സിനിമയാണ്.
വലിയ പരീക്ഷണങ്ങൾ നടത്തുന്ന സിനിമകളിൽ ചില പോരായ്മകളുണ്ടായിരിക്കും. എന്നാൽ തമിഴ് സിനിമകളിൽ മുമ്പെങ്ങും കണ്ടിട്ടില്ലാത്ത വിധമാണ് ക്യാമറ കൈകാര്യം ചെയ്തിരിക്കുന്നത്. കാഴ്ചവിസ്മയം പകരുന്ന സിനിമയാണ് കങ്കുവ. എന്നാൽ സിനിമയ്‌ക്കെതിരെ നെഗറ്റീവ് റിവ്യൂ മാത്രം പറയാൻ ചിലർ താത്പര്യപ്പെടുന്നതായി കണ്ടിരുന്നു. സിനിമ അവസാനിക്കുന്നതിന് മുമ്പായി മോശം അഭിപ്രായങ്ങളെത്തി. സിനിമയെ മോശമാക്കാൻ ആരൊക്കെയോ ശ്രമിക്കുന്നത് പോലെ തോന്നി.
ചിത്രത്തിന്റെ 3ഡി വർക്കുകളും ആശയവും മികച്ചതാണ്. തിയേറ്ററുകളിൽ പോയി കാണേണ്ട സിനിമയാണിത്. കങ്കുവയ്‌ക്ക് പിന്നിൽ പ്രവർത്തിച്ച ഓരോരുത്തരും കയ്യടി അർഹിക്കുന്നു. അഭിമാനിക്കൂ ടീം കങ്കുവ, നെഗറ്റീവ് കമന്റിടുന്നവർ ചിത്രത്തിന്റെ ഉയർച്ചയ്‌ക്കായി ഒന്നും ചെയ്തിട്ടില്ല.”- ജ്യോതിക കുറിച്ചു.
സംവിധായകൻ ശിവ ഒരുക്കിയ കങ്കുവ കേരളത്തിൽ 500 ലധികം തിയേറ്ററുകളിലാണ് പ്രദർശനം നടക്കുന്നത്. ബിഗ്ബജറ്റിൽ പിരീഡ് ആക്ഷൻ ഡ്രാമയായി ഒരുങ്ങിയ ചിത്രം ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് കേരളത്തിലെത്തിച്ചത്. നവംബർ 14 നായിരുന്നു സിനിമയുടെ റിലീസ്. ആദ്യ ദിനത്തിൽ 58 കോടി രൂപയിലധികം ആഗോള ഗ്രോസ് നേടിയിരുന്നു.
