ആലപ്പുഴ: വള്ളികുന്നത്ത് കാട്ടുപന്നിയുടെ ആക്രമണത്തിൽ വയോധികന് ഗുരുതര പരിക്ക്. വള്ളികുന്നം സ്വദേശി കെ പി രാജു (75) നാണ് പരിക്കേറ്റത്. ഇന്നലെ വൈകിട്ടായിരുന്നു സംഭവം.
വീടിനോട് ചേർന്നുള്ള പറമ്പിൽ കാട് വെട്ടിത്തെളിക്കുന്നതിനിടെ പാഞ്ഞെത്തിയ കാട്ടുപന്നി രാജുവിനെ കുത്തുകയായിരുന്നു. ഇയാളുടെ ബഹളം കേട്ട് നാട്ടുകാർ ഓടിയെത്തിയപ്പോഴേക്കും പന്നി ഓടിപ്പോയി. ആക്രമണത്തിൽ രാജുവിന്റെ ഇടത് കാലിൽ ഗുരുതരമായി പരിക്കേറ്റിട്ടുണ്ട്.
നിലവിൽ ഓച്ചിറയിലെ സ്വകാര്യ ആശുപത്രിയിൽ ചികിത്സയിലാണ് വയോധികൻ. ഇയാളുടെ കാൽ മുട്ടിൽ ആഴത്തിൽ പരിക്കേറ്റിട്ടുണ്ടെന്നും ആരോഗ്യസ്ഥിതി നിരീക്ഷിച്ചു വരികയാണെന്നും ഡോക്ടർമാർ അറിയിച്ചു. പ്രദേശത്ത് കാട്ടുപന്നി ശല്യം കൂടി വരികയാണെന്നും അധികൃതർ നടപടി സ്വീകരിക്കുന്നില്ലെന്നുമാണ് നാട്ടുകാരുടെ പരാതി.
