എറണാകുളം: നെടുമ്പാശേരി വഴി കടത്താൻ ശ്രമിച്ച അപൂർവ ഇനം പക്ഷികളെ തിരിച്ചയച്ചു.
പക്ഷികളെ ചൊവ്വാഴ്ച പുലർച്ചെയാണ് തായ് എയർവേയ്‌സിൽ തിരിച്ചയച്ചത്. തായ്‌ലാൻഡിലെ അനിമൽ ക്വാറൻന്റൈൻ അതോറിറ്റീസ് അധികൃതർ പക്ഷികളെ ഏറ്റുവാങ്ങി. എല്ലാ നടപടികളും പൂർത്തിയാക്കിയ ശേഷമാണ് പക്ഷികളെ തിരിച്ചയച്ചതെന്ന് കസ്റ്റംസ് ഉദ്യോഗസ്ഥർ പറഞ്ഞു.
വനംവകുപ്പിലെ വിദഗ്ധർ നിർദേശിച്ചതു പോലെ പക്ഷികളുടെ അവിടുത്തെ ആവാസ വ്യവസ്ഥകൾക്കനുസൃതമായി ആഹാരവും മറ്റും കസ്റ്റംസ് ഉദ്യോഗസ്ഥർ നൽകിയിരുന്നു. പിന്നീട് വനം വകുപ്പധികൃതർ വിശദമായി പരിശോധിച്ച് ആരോഗ്യസ്ഥിതി ഉറപ്പുവരുത്തുകയും ചെയ്തു. വായു കടക്കാവുന്ന രീതിയിൽ പാക്ക് ചെയ്താണ് അയച്ചത്.
കഴിഞ്ഞ ദിവസമാണ് നെടുമ്പാശേരി വിമാനത്താവളം വഴി കടത്താൻ ശ്രമിച്ച പക്ഷികളെ കൊച്ചി കസ്റ്റസ് പിടികൂടിയത്. തായ്‌ലാൻഡിൽ നിന്നുള്ള പക്ഷികളായിരുന്നു ഇവ. പക്ഷികളെ കടത്താൻ ശ്രമിച്ച തിരുവനത്തുപരം സ്വദേശികളായ ബിന്ദുമോൾ, ശരത് എന്നിവരെ കോടതിയിൽ ഹാജരാക്കി ഈ മാസം 17വരെ റിമാൻഡ് ചെയ്തു. ഇത്തരത്തിൽ പക്ഷിക്കടത്ത് ആവർത്തിക്കാതിരിക്കാൻ കർശന നിരീക്ഷണമേർപ്പെടുത്തിയതായി കസ്റ്റംസ് അറിയിച്ചു.
