പ്രണയത്തിന് കണ്ണും മൂക്കുമില്ലെന്നത് നമ്മളെല്ലാവരും എപ്പോഴും കേൾക്കുന്ന കാര്യമാണ്. അതേപോലെ പ്രണയം ഒരു മനുഷ്യനെ ചെറുപ്പക്കാരനാക്കുമെന്നും പറയാറുണ്ട്. അതേ അതിനി എത്ര വയസ്സായാലും ശരി തങ്ങളുടെ മനസിന് ചേർന്ന ഒരാൾ കിട്ടുകയാണെങ്കിൽ ആ വ്യക്തിയുടെ സാമിപ്യം നമ്മളിൽ വരുത്തുന്ന മാറ്റങ്ങൾ ചെറുതൊന്നുമല്ല. അത്തരത്തിൽ പ്രണയിച്ച് വിവാഹിതരായ ഒരു ദമ്പതികളാണ് ഇപ്പോൾ സമൂഹമാദ്ധ്യമങ്ങളിലാകെ ശ്രദ്ധ നേടുന്നത്.
പ്രായം ഒരു തടസ്സമല്ലെന്ന് സ്വന്തം ജീവിതം കൊണ്ട് തന്നെയാണ് അദ്ദേഹം തെളിയിച്ചിരിക്കുന്നത്. 100 വയസ്സുകാരനായ ബെർണി ലിറ്റ്മാന് തന്റെ വധുവായി കണ്ടെത്തിയത് ഒരു 102കാരിയെ ആണ്. മർജോരി ഫിറ്റർമാൻ എന്നാണ് ബെർണിയുടെ വധുവിന്റെ പേര്. ഫിലാഡൽഫിയ സ്വദേശികളാണ് ഇരുവരും. വയസ്സാംകാലത്തെ പ്രണയം ഗിന്നസ്ബുക്കിൽ ഇടം നേടിയതോടെയാണ് മാദ്ധ്യമങ്ങളും ഇരുവരേയും ശ്രദ്ധിച്ചത്. ലോകത്തിലെ ഏറ്റവും പ്രായമേറിയ നവദമ്പതികൾ എന്ന റെക്കോർഡാണ് ബെർണിയപം മർജോരിയും നേടിയത്.
ഒൻപത് വർഷങ്ങൾക്ക് മുൻപ് മുതിർന്ന പൗരന്മാർക്കുള്ള താമസസ്ഥലത്ത് വച്ചാണ് ബെർണിയും മർജോരിയും പരിചയപ്പെടുന്നത്. ബെർണിയുടെ ഭാര്യയും മർജോരിയുടെ ഭർത്താവും മരിച്ചതോടെയാണ് ഈ സ്ഥലത്ത് ഇവർ എത്തുന്നത്. ആദ്യം ഇരുവരും സുഹൃത്തുക്കളായി. സൗഹൃദം പിന്നീട് പ്രണയത്തിന് വഴിമാറി. ഈ വർഷം മെയ് 19ന് മർജോരിയെ ബെർണി വിവാഹം ചെയ്തു. വളരെ അടുത്ത ബന്ധുക്കൾ മാത്രമാണ് ഈ ചടങ്ങിൽ പങ്കെടുത്തത്. മറ്റൊരു രസകരമായ കാര്യം പഠനകാലത്ത് പെൻസിൽവാനിയ സർവകലാശാലയിൽ ഇരുവരും ഏതാണ്ട് ഒരേകാലത്താണ് പഠിച്ചത്. എന്നാൽ ഒരിക്കൽ പോലും പരസ്പരം കണ്ടിട്ടില്ല. നൂറ് വയസ്സിന് ശേഷമുള്ള ഈ കല്യാണത്തിന് ചുക്കാൻ പിടിച്ചത് ബെർണിയുടെ കൊച്ചുമകളായ സാറയാണ്. അവരുടെ സന്തോഷം മറ്റുള്ളവരുടെ കൂടി ജീവിതത്തിന് വെളിച്ചമേകുന്നതാണെന്നാണ് സാറ പറയുന്നത്.
