ബെംഗളൂരു : വീർ സവർക്കറുടെ ചിത്രം കർണാടക നിയമസഭയിൽ നിന്ന് നീക്കം ചെയ്യാനുള്ള ശ്രമവുമായി സിദ്ധരാമയ്യ സർക്കാർ . തീരുമാനത്തിനെതിരെ രൂക്ഷവിമർശനവുമായി ബിജെപി രംഗത്തെത്തി.2022ൽ മുൻ ബസവരാജ് ബൊമ്മൈ സർക്കാരാണ് ഛായാചിത്രം സ്ഥാപിച്ചത്.
‘ കർണാടക സർക്കാർ ഇതിന് കണക്ക് പറയണം . സ്വാതന്ത്ര്യ സമര സേനാനി സവർക്കറെ അപമാനിക്കാൻ അവർ ശ്രമിച്ചു. സ്വാതന്ത്ര്യ സമര സേനാനി സവർക്കറെ അപമാനിച്ചതിന് അടുത്ത തിരഞ്ഞെടുപ്പിൽ കർണാടക മുഖ്യമന്ത്രി സിദ്ധരാമയ്യ പരാജയപ്പെടും. ‘ – ബിജെപി നേതാവ് സുധീർ മുൻഗന്തിവാർ പറഞ്ഞു.
വോട്ടിനുവേണ്ടി ഹിന്ദുത്വ നിലപാട് ഉപേക്ഷിച്ച് ഉദ്ധവ് താക്കറെ നിശ്ശബ്ദത പാലിക്കുമോ? കോൺഗ്രസുമായി സഖ്യം രൂപീകരിക്കുമ്പോൾ താക്കറെ സവർക്കറുടെ ആശയങ്ങളെയും ഉപേക്ഷിക്കുകയാണ് . അതുകൊണ്ടാണ് ഇന്ന് അവരെ ‘ടിപ്പു സേന’ എന്ന് വിളിക്കുന്നത്. സ്വാതന്ത്ര്യ സമര സേനാനി സവർക്കറുടെ ചിന്തകൾ അനശ്വരമാണെന്നും അദ്ദേഹത്തെ അപമാനിച്ച കോൺഗ്രസിനും കൂട്ടാളികൾക്കും ചരിത്രം ഒരിക്കലും മാപ്പ് നൽകില്ലെന്നും മഹാരാഷ്‌ട്ര ബിജെപി സംസ്ഥാന അധ്യക്ഷൻ ചന്ദ്രശേഖർ ബവൻകുലെ പറഞ്ഞു.
അത്തരം തീരുമാനങ്ങൾക്ക് കോൺഗ്രസ് വലിയ വില നൽകേണ്ടി വരുമെന്ന് സവർക്കറുടെ ചെറുമകൻ രഞ്ജിത് സവർക്കർ പറഞ്ഞു. ‘കോൺഗ്രസ് സർക്കാരിൽ നിന്ന് എനിക്ക് മറ്റൊന്നും പ്രതീക്ഷിക്കാനാവില്ല. അവർ ടിപ്പു സുൽത്താനെ പുകഴ്‌ത്തുന്നു, സവർക്കറോട് ഇത് ചെയ്യുന്നു. സവർക്കറെ അധിക്ഷേപിക്കുന്നത് തുടർന്നാൽ അതിന് അവർ വില നൽകേണ്ടി വരും. വീർ സവർക്കറുമായി താരതമ്യപ്പെടുത്തുമ്പോൾ നെഹ്‌റുവിന്റെ സംഭാവന എന്താണ് ? ‘ എന്നും രഞ്ജിത്ത് സവർക്കർ ചോദിച്ചു.
