ഇടുക്കി: മൂന്നാറിൽ വീണ്ടും ഭീതി പരത്തി പടയപ്പയുടെ പരാക്രമം. സീരിയൽ ഷൂട്ടിംഗ് സംഘം സഞ്ചരിച്ച വാഹനത്തിന് നേരെ പാഞ്ഞടുത്ത പടയപ്പ കാറുകൾ തകർത്തു. 20 ലധികം വാഹനങ്ങൾക്ക് നേരെയാണ് പടയപ്പ പാഞ്ഞടുത്തത്.
സൈലന്റ് വാലി റോഡിൽ കുറ്റിയാർവാലിക്ക് സമീപത്തായിരുന്നു കാട്ടാന ആക്രമണം. വാഹനങ്ങൾക്ക് നേരെ പടയപ്പ പാഞ്ഞടുക്കുന്നത് ശ്രദ്ധയിൽപ്പെട്ടതോടെ വാഹനത്തിലുണ്ടായിരുന്നവർ ഓടി രക്ഷപ്പെടുകയായിരുന്നു. ആക്രമണത്തിൽ നിന്നും തലനാരിഴയ്ക്കാണ് ആളുകൾ രക്ഷപ്പെട്ടത്.
പടപ്പയുടെ പരാക്രമത്തിൽ രണ്ട് കാറുകൾക്കും ഒരു ബൈക്കിനും കേടുപാടുകൾ സംഭവിച്ചു. ഇതോടെ യാത്രക്കാർ വനംവകുപ്പ് ഉദ്യോഗസ്ഥരെ വിവരം അറിയിക്കുകയായിരുന്നു. ആർ ആർ ടി സംഘം സ്ഥലത്തെത്തി പടക്കം പൊട്ടിച്ച് പടയപ്പയെ കാട്ടിലേക്ക് തുരത്തി. സമീപ കാലങ്ങളിൽ പടപ്പയുടെ ആക്രമണം വർദ്ധിച്ചു വരികയാണെന്നാണ് നാട്ടുകാരുടെ പരാതി.
