പഴങ്ങളും പച്ചക്കറികളും വാങ്ങിയാൽ നേരെ ഫ്രിഡ്ജിനകത്തേക്ക് കയറ്റുന്ന ശീലം നമ്മിൽ പലർക്കുമുണ്ട്. എന്നാൽ എല്ലാ പച്ചക്കറികളും അതിന് അനുയോജ്യമല്ലെന്നതാണ് വാസ്തവം. ഉദാഹരണത്തിന് തക്കാളി..
ഫ്രിഡ്ജിൽ സൂക്ഷിക്കേണ്ട ഒന്നല്ല തക്കാളിയെന്നാണ് വിദഗ്ധർ പറയുന്നത്. കാരണം തക്കാളിയുടെ രുചി, ഗുണം, സ്വഭാവം, തുടങ്ങിയവയ്‌ക്കെല്ലാം ഫ്രഡ്ജിൽ വെക്കുമ്പോൾ മാറ്റം വരും. അതിനാൽ മാർക്കറ്റിൽ നിന്ന് വാങ്ങിച്ചുകൊണ്ടുവരുന്ന തക്കാളി നേരെ ഫ്രിഡ്ജിലേക്ക് കയറ്റേണ്ടതില്ല. മറിച്ച് അടുക്കളയിൽ തന്നെ വച്ചാൽ മതിയാകും.
തണുപ്പിനോട് റിയാക്ട് ചെയ്യുന്ന പ്രത്യേക തരം എൻസൈം തക്കളായിൽ അടങ്ങിയിട്ടുണ്ട്. അതിനാലാണ് തക്കാളി ഫ്രിഡ്ജിൽ വെക്കുമ്പോൾ അതിന്റെ രുചിയും സ്വഭാവവും മാറുന്നത്. മാത്രവുമല്ല, ഫ്രിഡ്ജിലെ മോശം ഗന്ധവും മറ്റും വലിച്ചെടുക്കുന്ന രീതിയും തക്കാളിക്കുണ്ട്. അതിനാൽ കഴിവതും തക്കാളി ഫ്രഡ്ജിൽ സൂക്ഷിക്കാതിരിക്കുക. തക്കാളിയുടെ ഗുണം നഷ്ടപ്പെടാതെ കഴിക്കാൻ ഫ്രിഡ്ജിന് പുറത്തുതന്നെ വെക്കുക.
സൂര്യപ്രകാശം നേരിട്ട് പതിക്കാത്ത ഏതെങ്കിലും ഭാഗത്ത് തക്കാളി സൂക്ഷിക്കാം. തക്കാളി പഴുത്തുകഴിഞ്ഞാൽ മൂന്ന് മുതൽ അഞ്ച് ദിവസത്തിനുള്ളിൽ കഴിക്കുക. ഇനി അഥവാ, തക്കാളി വേഗം പഴുപ്പിക്കണമെന്നാണെങ്കിൽ ഒരു പേപ്പർ ബാഗിൽ സൂക്ഷിച്ചാൽ മതി. അതുമല്ലെങ്കിൽ നേന്ത്രപ്പഴത്തിനൊപ്പമോ ആപ്പിളിനൊപ്പമോ സൂക്ഷിക്കാം. ഇങ്ങനെ വച്ചാൽ പച്ച തക്കാളി പെട്ടെന്ന് പഴുത്തുകിട്ടും.
