‘രാഹുൽ സ്ത്രീത്വത്തെ അപമാനിച്ചു’; ഭീഷണിയുടെ സ്വരത്തിൽ തട്ടിക്കയറി; രാജ്യസഭാ ചെയർമാന് കത്തയച്ച് ബിജെപി വനിതാ എംപി

ന്യൂഡൽഹി:സ്ത്രീത്വത്തെ അപമാനിക്കുന്ന തരത്തിൽ പ്രതിപക്ഷ നേതാവ് രാഹുൽ പെരുമാറിയെന്ന് ബിജെപി എപി ഫാങ്‌നോൺ കൊന്യാക്. ഇതുമായി ബന്ധപ്പെട്ട് രാജ്യസഭാ ചെയർമാൻ ജഗ്ദീപ് ധൻകറിന് ഫാങ്‌നോൺ കത്തെഴുതി. നാഗലാൻഡ് നിന്നുള്ള എംപിയാണ് ഫാങ്‌നോൺ കൊന്യാക്.

” പ്രതിപക്ഷ നേതാവ് രാഹുൽ പ്രതിഷേധത്തിനിടെ മോശമായി പെരുമാറി. എന്നോട് തട്ടിക്കയറുകയും ആക്രോശിച്ച് അടുത്തേക്ക് വരികയും ചെയ്തു. അദ്ദേഹത്തിന്റെ ശാരീരിക സാമീപ്യം വളരെ അടുത്തായതിനാൽ ഒരു സ്ത്രീയെന്ന നിലയിൽ അത്യധികം അസ്വസ്ഥത തോന്നി”.- ഫാങ്‌നോൺ കൊന്യാക് പറഞ്ഞു.

ഇൻഡി മുന്നണിയിലെ നേതാക്കളുമായി രാഹുലിന്റെയും പ്രിയങ്കയുടെയും നേതൃത്വത്തിലായിരുന്നു പ്രതിഷേധ പ്രകടനം. കോൺഗ്രസിനെതിരെ പ്രതിഷേധം നടത്തുന്ന ബിജെപി എംപിമാർക്കിടയിലേക്ക് രാഹുൽ തള്ളികയറാൻ ശ്രമിച്ചതോടെ ഉന്തും തള്ളുമുണ്ടാവുകയായിരുന്നു. ഇതിനിടയിലാണ് വനിതാ എംപിയോട് രാഹുൽ അപമര്യാദയായി പെരുമാറിയത്.

#WATCH | Delhi: BJP Rajya Sabha MP Phangnon Konyak says, “LoP Rahul Gandhi came close… I did not like it and he started shouting…Whatever happened today is very sad, this should not happen. We did not like the way they threatened…I have also complained to the Chairman…” https://t.co/d83HUvwQFl pic.twitter.com/oGtaja66le

— ANI (@ANI) December 19, 2024

രാഹുലിനെതിരെ കർശന നടപടി സ്വീകരിക്കണമെന്ന് കത്തിൽ പറയുന്നു. സംഭവിക്കാൻ പാടില്ലാത്തതാണ് സംഭവിച്ചതെന്നും ഭീഷണിയുടെ സ്വരത്തിലാണ് രാഹുൽ തന്നോട് തട്ടിക്കയറിയതെന്നും ഫാങ്‌നോൺ കത്തിൽ സൂചിപ്പിച്ചു. വനിത എംപിയെ അപമാനിക്കാൻ ശ്രമിച്ചതിൽ രാഹുലിനെതിരെ ബിജെപി പ്രതിഷേധവുമായി രംഗത്തെത്തി. രാഹുൽ മാപ്പ് പറയണമെന്നും ഇല്ലെങ്കിൽ നിയമനടപടി നേരിടേണ്ടി വരുമെന്നും ബിജെപി എംപിമാർ പ്രതികരിച്ചു.

രാഹുൽ ആക്രമിച്ചതിനെ തുടർന്ന് നേരത്തെ രണ്ട് ബിജെപി എംപിമാർക്ക് പരിക്കേറ്റിരുന്നു. മുകേഷ് രജ്പുത്തിനും പ്രതാപ് ചന്ദ്ര സാരംഗിനുമാണ് പരിക്ക്. ഇവരുടെ തലയ്‌ക്കാണ് പരിക്കേറ്റത്. എംപിമാരെ ആശുപത്രിയിൽ പ്രവേശിപ്പിച്ചു.