കൊല്ലം: പ്രായപൂർത്തിയാകാത്ത ആൺകുട്ടിയെ പീഡിപ്പിച്ച കേസിൽ 19 കാരിയായ യുവതി അറസ്റ്റിൽ. കുമ്പളത്ത് വീട്ടിൽ ശ്രീക്കുട്ടിയെയാണ് വള്ളിക്കുന്നം പൊലീസ് അറസ്റ്റ് ചെയ്തത്. കൊല്ലം ചവറ ശങ്കരമംഗലത്താണ് സംഭവം. ഭരണിക്കാവ് സ്വദേശിയായ ആൺകുട്ടിയെയാണ് യുവതി പീഡനത്തിനിരയാക്കിയത്.
ഇലിപ്പക്കുളത്ത് മാതാപിതാക്കൾക്കൊപ്പം താമസിക്കുന്ന ആൺകുട്ടിയെ യുവതി വിളിച്ചുകൊണ്ടുപോവുകയായിരുന്നു. ഡിസംബർ ഒന്നിനാണ് കേസിനാസ്പദമായ സംഭവം. ശ്രീക്കുട്ടി മറ്റൊരാളുമായി പ്രണയത്തിലായിരുന്നു. വീട്ടുകാർ ഇത് എതിർത്തിരുന്നു. കാമുകനുമായുള്ള ബന്ധം ഉപേക്ഷിക്കാൻ മാതാപിതാക്കൾ യുവതിയെ ആൺകുട്ടിയുടെ വീട്ടിലേക്ക് മാറ്റി നിർത്തി.
പതിനാറുകാരനെ വീട്ടിൽനിന്നും കൂട്ടികൊണ്ടുപോയ ശ്രീക്കുട്ടി മൈസൂരു, പാലക്കാട്, പഴനി, മലപ്പുറം തുടങ്ങിയ സ്ഥലങ്ങളിൽ താമസിപ്പിച്ച് പീഡിപ്പിക്കുകയായിരുന്നു. ചോദ്യംചെയ്യലിൽ പ്രതി കുറ്റം സമ്മതിച്ചതായി പൊലീസ് പറഞ്ഞു. കുട്ടിയുടെ അമ്മ നൽകിയ പരാതിയിലാണ് പൊലീസ് കേസെടുത്ത് അന്വേഷണം ആരംഭിച്ചത്. കഴിഞ്ഞ ദിവസം പത്തനംതിട്ട ബസ്റ്റാന്റിൽ നിന്നാണ് ശ്രീകുട്ടിയും 16 കാരനും പിടിയിലായത്. പ്രതിയായ യുവതിയെ റിമാൻഡ് ചെയ്തു.
