തിരുവനന്തപുരം: അന്തരിച്ച സാഹിത്യകാരൻ എം.ടി.വാസുദേവന് നായര്ക്ക് ആദരവര്പ്പിക്കുന്നതിനായി സാംസ്കാരിക വകുപ്പ് സംഘടിപ്പിക്കുന്ന അനുസ്മരണ സമ്മേളനം തിരുവനന്തപുരം ടഗോര് തിയറ്ററില് 31ന് വൈകിട്ട് 3ന്. സമ്മേളനം മുഖ്യമന്ത്രി പിണറായി വിജയന് ഉദ്ഘാടനം ചെയ്യും. ചടങ്ങില് മന്ത്രി സജി ചെറിയാന് അധ്യക്ഷനാകും.
മന്ത്രിമാരായ വി. ശിവന്കുട്ടി, ജി.ആര്. അനില്, പി.എ. മുഹമ്മദ് റിയാസ്, പ്രതിപക്ഷനേതാവ് വി.ഡി. സതീശന്, എം.പിമാരായ ശശി തരൂര്, എ.എ. റഹീം, ആന്റണി രാജു എം.എൽ.എ, മേയര് ആര്യ രാജേന്ദ്രന്, ജില്ലാ പഞ്ചായത്ത് പ്രസിഡന്റ് ഡി. സുരേഷ് കുമാര്, കൗണ്സിലര് രാഖി രവികുമാര്, ചീഫ് സെക്രട്ടറി ശാരദ മുരളീധരന്, അഡീഷണല് ചീഫ് സെക്രട്ടറി ഡോ. രാജന് ഖോബ്രഗഡേ, സാംസ്കാരിക വകുപ്പ് ഡയറക്ടര് ഡോ. ദിവ്യ എസ്. അയ്യര് എന്നിവര് ചടങ്ങിൽ പങ്കെടുക്കും.
എംടിയുടെ സിനിമകളിലെ ഗാനങ്ങള് കോര്ത്തിണക്കി പിന്നണി ഗായകന് രവിശങ്കര് നയിക്കുന്ന സംഗീതാര്ച്ചന, എംടിയുടെ സാഹിത്യകൃതികള്, തിരക്കഥകള് എന്നിവ ഉള്പ്പെടുന്ന പുസ്തകപ്രദര്ശനം, എംടിയുടെ ചലച്ചിത്ര ജീവിതത്തിലെ അനര്ഘനിമിഷങ്ങള് ഒപ്പിയെടുത്ത ഫോട്ടോപ്രദര്ശനം, മികച്ച സിനിമയ്ക്കുള്ള 1973ലെ ദേശീയ, സംസ്ഥാന പുരസ്കാരങ്ങള് നേടിയ നിര്മാല്യത്തിന്റെ പ്രദര്ശനം എന്നിവയും നടക്കും. ചടങ്ങിലേക്കുള്ള പ്രവേശനം സൗജന്യമാണ്.
