കാസര്കോട്: കൊല്ലൂർ മൂകാംബിക ക്ഷേത്രത്തിലെ മുൻ തന്ത്രിയും മുഖ്യ അർച്ചകനുമായിരുന്ന മഞ്ജുനാഥ അഡിഗ (64) അന്തരിച്ചു. ഇന്ന് ഉച്ചയോടെ കുളിമുറിയിൽ കുഴഞ്ഞു വീഴുകയായിരുന്നു. ഡോക്ടറെത്തി പരിശോധിച്ച് മരണം സ്ഥിരീകരിക്കുകയായിരുന്നു. കൊല്ലൂർ മൂകാംബിക ക്ഷേത്രത്തിൽ ഇരുപതു വർഷത്തോളം തന്ത്രിയും മുഖ്യ അർച്ചകനുമായിരുന്നു. ഹൃദയാഘാതത്തെ തുടര്ന്നാണ് അന്ത്യം.
ക്ഷേത്രം ട്രസ്റ്റി ബോര്ഡ് അംഗമായിരുന്നു. നിലവിലെ തന്ത്രിയും മുഖ്യ അർച്ചകനുമായ നിത്യാനന്ദ അഡിഗ മകനാണ്. പതിനായിരത്തിലേറെ ചണ്ഡികാ യാഗങ്ങൾക്ക് കാർമ്മികത്വം വഹിച്ച അദ്ദേഹം ക്ഷേത്രത്തിലെത്തുന്ന മലയാളികളുമായി അടുത്ത ബന്ധം പുലർത്തിയിരുന്നു.
മംഗള ഗൗരിയാണ് ഭാര്യ. മകൾ: ദാക്ഷായണി. മരുമക്കൾ: കെ.എസ്.രക്ഷിത, പ്രജ്ഞാന. സഹോദരരങ്ങൾ: പരേതനായ അരുണ അഡിഗ, ഗൗരി, പത്മാവതി. സംസ്കാരം രാത്രിയോടെ സൗപർണിക നദീതീരത്തെ ശ്മശാനത്തിൽ നടന്നു.എംപി ബിവൈ രാഘവേന്ദ്ര, ബൈന്ദൂര് എംഎൽഎ ഗുരുരാജ് ഗാന്ദിഗോളെ, കോട്ട ശ്രീനിവാസ പൂജാരി, എംഎൽഎ കിരണ് കുമാര് കൊഡ്ഗി തുടങ്ങിയ നിരവധി പേര് അദ്ദേഹത്തിന്റെ വിയോഗത്തിൽ അനുശോചിച്ചു.
