ലുധിയാന: പഞ്ചാബിൽ ആംആദ്മി പാർട്ടി എംഎൽഎ വെടിയേറ്റ് മരിച്ചു. ലുധിയാന വെസ്റ്റ് നിയോജക മണ്ഡലത്തിലെ ജനപ്രതിനിധിയായ ഗുർപ്രീത് ഗോഗി ബസ്സിയാണ് മരിച്ചത്. വെള്ളിയാഴ്ച അർദ്ധരാത്രിക്കും ശനിയാഴ്ച പുലർച്ചയ്‌ക്കും ഇടയിലായിരുന്നു സംഭവം.
വെടിയേറ്റ ഗുർപ്രീതിനെ ദയാനന്ദ് മെഡിക്കൽ കോളേജ് (DMC) ആശുപത്രിയിലേക്ക് ഉടൻ എത്തിച്ചെങ്കിലും ജീവൻ രക്ഷിക്കാനായില്ലെന്ന് ഡിസിപി ജസ്കരൻ സിംഗ് തേജ അറിയിച്ചു. സംഭവത്തിൽ അന്വേഷണം തുടരുകയാണെന്നും അദ്ദേഹം പറഞ്ഞു.
വെടിയേറ്റ നിലയിലാണ് ഗോഗിയെ കണ്ടെത്തിയത്. അദ്ദേഹം സ്വയം വെടിയുതിർത്തതാണോ തോക്കിൽ നിന്ന് അബദ്ധത്തിൽ വെടിയേറ്റതാണോ എന്ന കാര്യം വ്യക്തമല്ല. പോസ്റ്റ്മോർട്ടം റിപ്പോർട്ട് പുറത്തുവന്നതിന് ശേഷമേ മരണകാരണം കണ്ടെത്താനാകൂവെന്ന് പൊലീസ് വ്യക്തമാക്കി.
2022-ലാണ് ഗുർപ്രീത് ഗോഗി (58) ആംആദ്മി പാർട്ടിയിൽ ചേർന്നത്. തുടർന്നുണ്ടായ നിയമസഭാ തെരഞ്ഞെടുപ്പിൽ കോൺഗ്രസിന്റെ സിറ്റിംഗ് എംഎൽഎ ഭാരത് ഭൂഷൺ ആഷുവിനെ പരാജയപ്പെടുത്തുകയായിരുന്നു.
