ഒട്ടാവ: ഏറ്റവും ആഴത്തിലുള്ള അണ്ടർവാട്ടർ മോഡൽ ഫോട്ടോഷൂട്ട് നടത്തി റെക്കോർഡിട്ട് കനേഡിയൻ ഫോട്ടോഗ്രാഫർ. വെള്ളത്തിനടിയിൽ 50 മീറ്റർ (163 അടി) ആഴത്തിൽ ഫോട്ടോഷൂട്ട് നടത്തിയാണ് ഫോട്ടോഗ്രാഫർ സ്റ്റീവൻ ഹെയ്നിംഗ് പുതിയ ഗിന്നസ് വേൾഡ് റെക്കോർഡ് സ്ഥാപിച്ചത്. യുഎസിലെ ഫ്ലോറിഡയിലെ അറ്റ്ലാന്റിക്ക് തീരത്തിനടുത്ത് തകർന്ന കപ്പലിന്റെ ഡെക്കിലാണ് ഷൂട്ട് നടന്നത്.
ഇത്തരത്തിൽ സാഹസിക അണ്ടർ വാട്ടർ ഷൂട്ടുകൾക്ക് പേരുകേട്ട സ്റ്റീവൻ ഇതിനുമുൻപും രണ്ടുതവണ റെക്കോർഡ് ഭേദിച്ചിട്ടുണ്ട്. 2021 ൽ 21 അടി ആഴത്തിലും 2023 ൽ 30 അടി ആഴത്തിലും ഫോട്ടോഷൂട്ട് നടത്തിയാണ് റെക്കോർഡിട്ടത്. എന്നാൽ 2023 ൽ കനേഡിയൻ പൗരന്മാരായ ബ്രൂണോയും പിയ ഒയാർസുനും ചേർന്ന് 131 അടി ആഴത്തിൽ ഫോട്ടോഷൂട്ട് നടത്തി അദ്ദേഹത്തിന്റെ റെക്കോർഡ് മറികടന്നു. എന്നാൽ ഇത് മറികടന്ന് റെക്കോർഡ് തിരിച്ചുപിടിക്കാനുള്ള സ്റ്റീവിന്റെ ശ്രമമാണ് വിജയം കണ്ടിരിക്കുന്നത്.
തീവ്ര പരിശീലനത്തിന് ശേഷമാണ് മോഡൽ സിയാര അൻ്റോവ്സ്കി ഉൾപ്പെടെയുള്ള സ്റ്റീവന്റെ ടീം വെള്ളത്തിനടിയിൽ ഫോട്ടോഷൂട്ട് നടത്തിയത്. വെള്ളത്തിനടിയിൽ ഒഴുകുന്ന തൂവെള്ള ഗൗണും കറുത്ത ബൂട്ടും ധരിച്ച മോഡൽ സിയാര അൻ്റോവ്സ്കിയുടെ അതിശയിപ്പിക്കുന്ന ചിത്രങ്ങൾ സ്റ്റീവൻ തന്റെ ഇൻസ്റ്റഗ്രാം പേജിലും പങ്കിട്ടു. സ്രാവുകളുടെ സാന്നിധ്യം, ഉയർന്ന മർദ്ദം, തകർന്ന കപ്പലിന്റെ അവശിഷ്ടങ്ങൾ എന്നിവയെല്ലാം ഷൂട്ടിങ്ങിൽ വെല്ലുവിളി ഉയർത്തിയെന്ന് അദ്ദേഹം പോസ്റ്റിനൊപ്പം കുറിച്ചു.
View this post on Instagram
