നല്ല പാട്ട്, ചീത്ത പാട്ട് അങ്ങനെയൊന്ന് ഇല്ലെന്നും എല്ലാ പാട്ടുകളും നല്ലതാണെന്നും ഗായകൻ എം ജി ശ്രീകുമാർ. കഴിഞ്ഞ 45 വർഷമായി താൻ സ്റ്റേജ് പ്രോഗ്രാമുകൾ ചെയ്യുന്നുണ്ടെന്നും എല്ലാവർക്കും ഇഷ്ടപ്പെട്ട ഗാനങ്ങളാണ് താൻ പാടാറുള്ളന്നതെന്നും എം ജി ശ്രീകുമാർ പറഞ്ഞു. അടുത്തിടെ അമ്പലപ്പുഴയിൽ നടന്ന ഒരു സ്റ്റേജ് പ്രോഗ്രാമിനിടെ നല്ല പാട്ട് പാടണമെന്ന് കമന്റ് പറഞ്ഞയാൾക്ക് ചുട്ട മറുപടി നൽകിയ എംജിയുടെ വീഡിയോ സമൂഹമാദ്ധ്യമങ്ങളിൽ ഏറെ വൈറലായിരുന്നു. ഇതിന്റെ പശ്ചാത്തലത്തിൽ ചില ഓൺലൈൻ മാദ്ധ്യമങ്ങളോട് പ്രതികരിക്കുകയായിരുന്നു എം ജി ശ്രീകുമാർ.
“കഴിഞ്ഞ 45 വർഷമായി ഞാൻ പ്രോഗ്രാം ചെയ്യുന്നുണ്ട്. കേരളത്തിലെ എല്ലാ ജനങ്ങളും അത് ആസ്വദിക്കുകയും എന്നെ പിന്തുണയ്‌ക്കുകയും ചെയ്യുന്നു. അവരോടെല്ലാം എനിക്ക് നന്ദി മാത്രമാണ് പറയാനുള്ളത്. എല്ലാവർക്കും ഇംഗിതപ്പെട്ട, അവർക്ക് ഇഷ്ടപ്പെട്ട എല്ലാ പാട്ടുകളും ഞാൻ പാടാറുണ്ട്. ഇന്നുവരെ ഞാൻ അങ്ങനെയാണ് ചെയ്യാറ്. കഴിഞ്ഞ 45 വർഷവും അത് തന്നെയാണ് ഞാൻ ചെയ്യുന്നത്”.
“ആ സംഭവത്തിന് ശേഷം എന്നെ ഒരുപാട് പേർ പിന്തുണച്ച് സംസാരിച്ചു. അതിൽ ഒരുപാട് സന്തോഷമുണ്ട്.
ഞാൻ വെറുമൊരു പാട്ടുകാരനാണ്. നിങ്ങൾക്ക് ഇഷ്ടപ്പെട്ട പാട്ടുകൾ ഞാൻ പാടുന്നു. അതിൽ നല്ല പാട്ട് ചീത്ത പാട്ട് എന്നൊന്ന് ഇല്ലെന്നും എല്ലാ പാട്ടുകളും നല്ലതാണെന്നും” അദ്ദേഹം പറഞ്ഞു.
പാടുന്നതിനിടെ ‘ഇനിയൊരു നല്ല പാട്ട് പാടൂ’ എന്നായിരുന്നു സദസിൽ നിന്നുവന്ന കമൻ്റ്. ഇത്രയും നേരം പാടിയത് മോശം പാട്ടായിരുന്നോയെന്നും നല്ലത് കേൾക്കണമെങ്കിൽ വീട്ടിൽ പോയി റേഡിയോ വച്ച് കേൾക്കണമെന്നുമായിരുന്നു എം ജി ശ്രീകുമാറിന്റെ മറുപടി.
