ന്യൂയോർക്ക്: പ്രധാനമന്ത്രി നരേന്ദ്രമോദിക്ക് ‘ഓർമ്മപ്പുസ്തകം’ സമ്മാനമായി നൽകി അമേരിക്കൻ പ്രസിഡന്റ് ഡോണൾഡ് ട്രംപ്. കഴിഞ്ഞ ദശാബ്ദത്തിനിടെ ഇരുവരും തമ്മിൽ കൂടിക്കാഴ്ച നടത്തിയതിന്റെ ചിത്രങ്ങൾ അടങ്ങിയ ഫോട്ടോപുസ്തകമാണ് മോദിക്കായി ട്രംപ് സമ്മാനിച്ചത്.
President Trump often talks about MAGA.
In India, we are working towards a Viksit Bharat, which in American context translates into MIGA.
And together, the India-USA have a MEGA partnership for prosperity!@POTUS @realDonaldTrump pic.twitter.com/i7WzVrxKtv
— Narendra Modi (@narendramodi) February 14, 2025
“നമ്മുടെ ഒന്നിച്ചുള്ള യാത്ര” (Our Journey Together) എന്ന പുസ്തകത്തിന്റെ ഒപ്പുവച്ച പകർപ്പ് ഇന്ത്യൻ പ്രധാനമന്ത്രിക്ക് ട്രംപ് കൈമാറി. വൈറ്റ്ഹൗസിൽ നടന്ന കൂടിക്കാഴ്ചയ്ക്ക് ശേഷമായിരുന്നു ഫോട്ടോ ആൽബം മോദിക്ക് നൽകിയത്.
അമേരിക്കയിൽ ട്രംപ് അധികാരമേറ്റ നാൾ മുതൽ മോദിയുമായി നടത്തിയ എല്ലാ കൂടിക്കാഴ്ചകളുടെയും ചിത്രങ്ങളടങ്ങുന്ന ഫോട്ടോബുക്ക് ആണ് അദ്ദേഹം മോദിക്ക് സമ്മാനിച്ചത്. 2019 സെപ്റ്റംബറിൽ മോദി അമേരിക്കയിലെത്തിയപ്പോൾ സംഘടിപ്പിച്ച ‘ഹൗഡി മോഡി’ ചടങ്ങിന്റെ ചിത്രങ്ങളും 2020ൽ ട്രംപ് ഇന്ത്യയിലെത്തിയപ്പോൾ നടന്ന ‘നമസ്തേ ട്രംപ്’ ചടങ്ങിലെ ഓർമകളും ഫോട്ടോബുക്കിലുണ്ട്.
Mr Prime Minister, you are great എന്നെഴുതി ഒപ്പുവച്ചതിന് ശേഷമാണ് ട്രംപിന്റെ ഫോട്ടോപുസ്തകം മോദിക്ക് സമ്മാനിച്ചത്. ഇന്ത്യൻ പ്രധാനമന്ത്രി മോദിയെ സ്വീകരിക്കാൻ കഴിഞ്ഞത് ബഹുമതിയായി കണക്കാക്കുന്നുവെന്നും തന്റെ ദീർഘകാല സുഹൃത്താണ് മോദിയെന്നും ട്രംപ് മാദ്ധ്യമങ്ങളോട് പറഞ്ഞു.
വൈറ്റ്ഹൗസിൽ ഗംഭീര സ്വീകരണം നൽകിയ ട്രംപിന് കൃതജ്ഞത അറിയിച്ച മോദി അമേരിക്കൻ പ്രസിഡന്റിനെ അഭിനന്ദിക്കുകയും ചെയ്തു. പ്രസിഡന്റിൽ നിന്ന് താൻ പഠിക്കുന്നതും അദ്ദേഹത്തെ വളരെയധികം അഭിനന്ദിക്കുന്നതുമായ കാര്യം, ട്രംപ് ദേശീയ താൽപ്പര്യത്തിന് പരമപ്രധാന്യം നൽകുന്നുവെന്നതാണ്. അദ്ദേഹത്തെപ്പോലെ, ഭാരതത്തിന്റെ ദേശീയ താൽപ്പര്യമാണ് ഏറ്റവും പ്രധാനപ്പെട്ടതെന്ന് താനും കരുതുന്നുവെന്ന് പ്രധാനമന്ത്രി മോദി പറഞ്ഞു.
